પાટણમાં બાંધકામના સામાનની ચોરી કરનાર ચોર રૂ. 38 હજારના મુદ્દામાલ સાથે ઝડપાયો

ઝડપાયેલ ચોરની ૧૦ ગુનામાં સંડોવણી હોવાનું સામે આવ્યું; પાટણ શહેરના વાળીનાથ ચોક નજીક ગોકુલવાટિકા સોસાયટી માં તાજેતરમાં થયેલી બાંધકામ સામાનની ચોરીનો ભેદ પોલીસે ગણતરી ના દિવસોમાં ઉકેલ્યો છે. પોલીસે ડીસા વંદના બંગ્લોઝ સોસાયટીના રહેવાસી હિતેશપુરી ઉર્ફે એકશન બાબુપુરી ગૌસ્વામીને રૂ.૩૮ હજારના મુદામાલ સાથે ઝડપી લઈ પુછપરછ કરતાં આરોપી ૧૦ જેટલા ગુનામાં સંડોવાયેલ હોવાનું જાણવા મળ્યું છે. આ બાબતે પોલીસ સુત્રો તરફથી મળતી હકીકત મુજબ પાટણ શહેરના વાળીનાથ ચોક નજીક ગોકુલ વાટિકા સોસાયટી માં નવીન બની રહેલ મકાનમાં માલસામાન ની ચોરી થઈ હોવાની મકાન માલિક ઘરમસિંહભાઈ દેસાઈએ બી ડિવિઝન પોલીસ મા ફરિયાદ નોંધાવી હતી જે ફરિયાદ આધારે પોલીસે સીસીટીવી ફૂટેજ, હ્યુમન સોર્સ અને ટેકનિકલ સર્વેલન્સની મદદથી આરોપીને માતરવાડી બસ સ્ટેશનથી પકડી તેની પાસેથી રૂ.૩૮ હજારનો  મુદ્દામાલ કબજે કરવામાં આવ્યો હતો. આ મુદ્દામાલમાં ૩૫ ટાઇલ્સની પેટીઓ, વોલેન્ટ ટબ, રસોડાસિંક અને ઇલેક્ટ્રિક-પ્લમ્બિંગ ફિટિંગના સાધનોનો સમાવેશ થાય છે. પોલીસ પૂછપરછમાં આરોપીએ પાટણમાં પાંચ અલગ-અલગ સ્થળોએથી ચોરી કરી હોવાની કબૂલાત કરી છે. તેણે નવજીવન સોસાયટી, વાળીનાથ વિસ્તાર, ઉપવન બંગ્લોઝ, મોદી સમાજ સંકુલ અને તમન્ના સોસાયટી માંથી બાંધકામ સામાન ચોર્યો હોવાની સાથે તેની વિરુદ્ધ પાટણ, પાલનપુર અને ડીસામાં કુલ ૧૦ ગુના નોંધાયેલા હોય પોલીસે તેની અટકાયત કરી આગળની કાયૅવાહી હાથ ધરી હોવાનું જાણવા મળ્યું છે.