અંબાજીમાં મુખ્ય બજારમાં શોર્ટ સર્કિટથી દુકાનમાં આગ લાગી

અંબાજી ગ્રામ પંચાયત શોપિંગ સેન્ટરમાં આવેલી એક કપડા સિલાઈની દુકાનમાં આજે શોર્ટ સર્કિટને કારણે આગ લાગી હોવાનું પ્રથમ દ્રષ્ટિએ અનુમાન લગાવવા મા આવી રહ્યું છે. બંધ દુકાનમાંથી નીકળતા ધુમાડાના ગોટેગોટા દૂર સુધી દેખાતા હતા. આગની જાણ થતાં જ ફાયર બ્રિગેડની ટીમ તાત્કાલિક ઘટના સ્થળે પહોંચી હતી.આગની ઘટનાને પગલે મુખ્ય બજારમાં મોટી સંખ્યામાં લોકો એકઠા થયા હતા. ફાયર બ્રિગેડની ટીમે સમયસર કાર્યવાહી કરીને આગ પર કાબૂ મેળવ્યો હતો. જો કે, આગમાં દુકાનનો તમામ સામાન બળીને ખાક થઈ ગયો હતો.ઘટનાની જાણ થતાં અંબાજી પોલીસ પણ તાત્કાલિક ઘટના સ્થળે પહોંચી હતી. નવા ચૂંટાયેલા સરપંચે પણ ઘટના સ્થળની મુલાકાત લીધી હતી. સરપંચે દુકાન માલિકને આર્થિક મદદ કરવાની જાહેરાત કરી હતી અને વધુ મદદ માટે પણ આશ્વાસન આપ્યું હતું.