પાલનપુરમાં ભર ઉનાળે વરસાદી માહોલ; સામાન્ય વરસાદે પણ તંત્રની પોલ ખોલી,કરા પડ્યા,વીજળી ડૂલ

શહેરના રોડ પર પાણી ભરાતા પ્રજા પરેશાન: નઘરોળ પાલિકા તંત્ર કુંભકર્ણની નિંદ્રામાં, પાલનપુરમાં હવામાન વિભાગની આગાહીના પગલે કમોસમી માવઠું થયું હતું. ગતરાત્રે વાવાઝોડાં અને ગાજવીજ સાથે એક ઇંચ જેટલો વરસાદ પડતા પાલનપુર શહેરના નીચાણવાળા વિસ્તારોમાં પાણી ભરાયા હતા. ભારે પવન ફૂંકાતા ઠેરઠેર વૃક્ષો પડી જવાની સાથે છાપરાં ઉડી જવાના બનાવો પણ સામે આવ્યા હતા. હવામાન વિભાગની આગાહીના પગલે પાલનપુર શહેરમાં ગતરાત્રે ભારે પવન અને ગાજવીજ સાથે વરસાદની શરૂઆત થઈ હતી. પાલનપુરમાં ભર ઉનાળે ચોમાસુ જેવો માહોલ સર્જાયો હતો. ગરમીના પ્રકોપ વચ્ચે કમોસમી વરસાદ પડતા વાતાવરણમાં ઠંડક પ્રસરી હતી. જોકે, વાવાઝોડા સાથે વરસાદને પગલે પાલનપુર શહેરના અનેક વિસ્તારોમાં વીજળી ડૂલ થઈ જતા લોકો પરેશાન થઈ ગયા હતા. જોકે, વરસાદને પગલે વાતાવરણમાં ઠંડક પ્રસરતા લોકોએ હાશકારો અનુભવ્યો હતો.

જોકે, કરા સાથે પડેલા સામાન્ય વરસાદમાં પાલનપુર શહેરના અનેક જાહેર માર્ગો પર પાણી ભરાતા વાહન ચાલકો મુશ્કેલીમાં મુકાયા હતા. પાલનપુર શહેરના ડેરી રોડ પર જહાંઆરા બાગ-શશીવન પાસેના રોડ પર વરસાદી પાણી ભરાતાં રાહદારી ઓ અને વાહન ચાલકો મુશ્કેલીમાં મુકાયા હતા. ભર ઉનાળે કમોસમી વરસાદથી પાલનપુર શહેરની હાલત જોતાં ચોમાસામાં વધારે વરસાદ પડે તો શું પરિસ્થિતિ ઉભી થશે? તે આ ભરાયેલા વરસાદી પાણીના દ્રશ્યો પરથી ખ્યાલ આવી જાય છે. આજે સવારના સમયે અહીં થી પસાર થતાં અનેક લોકોના વાહનો પણ વરસાદી પાણીમાં બંધ થઈ ગયા હતા. પાલનપુર ની પ્રજા પરેશાન થઈ રહી છે. નઘરોળ પાલિકા તંત્ર કુંભકર્ણની ગાઢ નિંદ્રામાં છે. ત્યારે આગામી ચોમાસાને ધ્યાનમાં રાખી પ્રિમોન્સૂન કામગીરીનો એક્શન પ્લાન તૈયાર કરાય તેવી માંગ ઉઠી છે.

પાલનપુરમાં ભર ઉનાળે વરસાદી માહોલ; સામાન્ય વરસાદે પણ તંત્રની પોલ ખોલી,કરા પડ્યા,વીજળી ડૂલ

સંબંધિત સમાચાર

દાંતા નજીક ગમખ્વાર અકસ્માત: બાઇક અને સ્વિફ્ટ કાર વચ્ચે ટક્કર, યુવક-યુવતીના ઘટનાસ્થળે મોત

ઝેરડા ગામે વરસાદ પડતાં ગટર ઉભરાઈ, રોડના કામમાં બેદરકારીથી ગ્રામજનો ત્રાહીમામ

ડીસા કોર્ટનો ચુકાદો: સગીરા પર દુષ્કર્મ કેસમાં આરોપીને ૨૦ વર્ષની સખત કેદ અને ૫ લાખ વળતર

પર્યાવરણની રક્ષા: જૂના ડીસા ફાટક સુધીના માર્ગ પર ૨૦૦થી વધુ વૃક્ષો વાવવામાં આવ્યા