વાહન ચાલકો પરેશાન; પાટણ-શિહોરી હાઇવે પર ખાડા પડવાથી અકસ્માતનો ભય  

પાટણ-શિહોરી હાઈવે પર પહેલા વરસાદમાં જ રસ્તાની હાલત બગડી ગઈ છે. પાટણ-શિહોરી ત્રણ રસ્તાથી કાંસા સુધી, નાયતા અને ભુતિયાવાસણા પુલ પર તેમજ હાઈવેના અનેક ભાગોમાં મસમોટા ખાડા પડી ગયા છે. ઊંડા ખાડા પડતા વાહનચાલકોમાં અકસ્માતનો ભય છે. નાના વાહનો ખાડામાં ખાબકે છે. રસ્તાની હાલત ખરાબ થતાં વાહનચાલકો અને રાહદારીઓને ભારે હાલાકીનો સામનો કરવો પડી રહ્યો છે. હાઈવે પર બનાસ નદીના રેતના થર જામી જતા વરસાદી પાણી ભરાઈ રહે છે. જેના કારણે વાહનચાલકોને અવરજવર કરવામાં મુશ્કેલી પડે છે. વરસાદની સિઝન શરૂ થતાં જ નાયતા અને ભુતિયાવાસણા ગામના પુલ પર પણ મસ મોટા ખાડા પડી ગયા છે. ખાડા પૂરવામાં આવે તેવી માંગ વાહનચાલકો કરી રહ્યા છે. હાઈવેની હાલત જોઈ વાહનચાલકોમાં રોષ વ્યાપ્યો છે.