પાટણમાં એક માતાએ પોતાની દીકરી અને જમાઈ વિરુદ્ધ ચેક ચોરીનો ગુનો નોંધાવ્યો..!

પાટણ શહેરમાં એક વૃદ્ધ માતાએ પોતાની દીકરી અને જમાઈ વિરુદ્ધ ચેક ચોરીની ફરિયાદ નોંધાવતા ચકચાર મચી જવા પામી છે. આ બાબતે મળતી માહિતી મુજબ પાટણના કસુંબીયાપાડા વિસ્તારમાં રહેતા મેનાબેન શંકરલાલ પટેલ (ઉ.વ.૬૭) નાઓએ પોતાની દીકરી સોનલબેન અને જમાઈ દિલીપભાઈ પસાભાઈ પટેલ સામે કરેલ પોલીસ ફરિયાદમાં જણાવ્યું છે કે પોતાની દીકરી તેમજ જમાઈ એ એપ્રિલ ૨૦૨૪ થી એપ્રિલ ૨૦૨૫ના સમય દરમિયાન મેનાબેનના ઘરના કબાટમાંથી ચાર ચેક ચોરી કર્યા છે. આ ચેક પાટણની નાગરિક સહકારી બેંકના ખાતા નંબર ૮૧૫૦૦૧૦૬૦૧૦૧૩૩૦૫ના છે. અને ચોરાયેલા ચેકના નંબર ૧૧૬૦૯૩.૧૧૬૧૦૫, ૧૧૬૧૦૭ અને ૧૧૬૧૧૦ છે. પાટણ એ ડિવિઝન પોલીસે ભારતીય ન્યાય સંહિતા-૨૦૨૩ની કલમ ૩૦૫(એ) અને ૫૪ હેઠળ વૃધ્ધાની ફરિયાદ આધારે તેમની દિકરી અને જમાઈ સામે ગુનો નોંધી તપાસ હાથ ધરી હોવાનું જાણવા મળ્યું છે. પાટણ શહેરમાં પટેલ પરિવારના સભ્યો દ્વારા જ આચરવામાં આવેલી આ ચોરીનો કિસ્સો સમગ્ર પટેલ સમાજમાં ચર્ચાનો વિષય બન્યો છે.