પોલીસ અને માનવતા ગ્રુપે માનવતા મ્હેંકાવી
ભાભર શહેરમાં ધોધમાર વરસાદ દરમિયાન રસ્તા પર ભટકી રહેલો એક માનસિક અસ્થિર યુવાન મળી આવતા પોલીસે માનવતાનો ઉત્તમ દાખલો પૂરું પાડ્યો હતો. પોલીસ અને માનવતા ગ્રુપના સંયુક્ત પ્રયાસોથી યુવાનને સુરક્ષિત રીતે ઉમતા સ્થિત અપના ઘર આશ્રમ ખાતે ખસેડવામાં આવ્યો છે.
મળી આવેલા યુવાનની ઓળખ નરેન્દ્રપાલ સિંહ દીપચંદ તરીકે થઈ છે. તે ઉત્તર પ્રદેશના અલીગઢ જિલ્લાના કોલ તાલુકાના પાલા રોડ, હોલી ચોક વિસ્તારનો રહેવાસી હોવાનું જાણવા મળ્યું છે. પોલીસ ઇન્સ્પેક્ટર એચ. એલ. જોષીના માર્ગદર્શન હેઠળ ભાભર પોલીસ સ્ટેશનની ટીમ અને માનવતા ગ્રુપ ભાભરે તાત્કાલિક કાર્યવાહી કરી યુવાનને સુરક્ષિત સ્થળે પહોંચાડ્યો હતો. આશ્રમમાં તેની જરૂરી સારવાર, સંભાળ અને પરિવાર સાથે પુનઃમિલન કરાવવા માટેની પ્રક્રિયા હાથ ધરવામાં આવશે. આ માનવતાભર્યા પ્રયાસને સ્થાનિક લોકોએ બિરદાવ્યો હતો અને પોલીસ તથા માનવતા ગ્રુપની માનવતાની પ્રશંસા કરી હતી.
