વ્યાપક નુકશાનથી ખેડૂતોમાં રોષ છવાયો
ભાભર તાલુકાના વજાપુર ગામની સીમમાંથી પસાર થતી વજાપુર માઈનોર કેનાલ વારંવાર ઓવરફ્લો થતી હોવાના ખેડૂતોએ આક્ષેપ કર્યા છે. આ વિસ્તારના ખેડૂતોએ જણાવ્યું હતું કે અમોએ કેનાલના ગેટમેન સહિત જવાબદાર નર્મદા વિભાગ અધિકારીઓને વારંવાર રજૂઆતો કરી જણાવ્યું હતું કે અમારા ખેતરોમાંથી પસાર થતી કેનાલનો ભાગ નીચો હોવાથી કેનાલ સાંકડી તેમજ સફાઈના અભાવે વારંવાર અહીં કેનાલ ઓવરફ્લો થતાં ખેતરોમાં પાણી ભરાઇ જાય છે. ગત સોમવારની રાત્રે કેનાલ ઓવરફ્લો થતાં પાણી દિવેલાના ઉભા પાક તેમજ આજુબાજુના ખેતરમાં ભરાઈ જતાં હવે વાવેતર કઈ રીતે કરવું તે મોટો સવાલ ઉભો થયો છે. ચોમાસું સિઝન તો નિષ્ફળ ગઈ પરંતુ શિયાળુ સિઝન પણ નર્મદા વિભાગના જવાબદાર તંત્રના પાપે નિષ્ફળ જવાની ભિતિ સેવાઈ રહી છે. સત્વરે યોગ્ય ધટતુ કરીને કેનાલની હાઈટ વધારવામાં આવે તેવી ખેડૂતો માંગ કરી રહ્યા છે.





