બનાસકાંઠા જિલ્લાના થરાદ પંથકમાંથી જીવદયા અને માનવતાનું ઉત્તમ ઉદાહરણ પૂરતી એક ઘટના સામે આવી છે. અહીં થરાદ પાસેથી પસાર થતી વિશાળ નર્મદા કેનાલમાં અચાનક એક આખલો (નંદી) ખાબક્યો હતો. કેનાલમાં પાણીનો પ્રવાહ વધુ હોવાથી મૂંગા પશુ માટે બહાર નીકળવું મુશ્કેલ બન્યું હતું અને તેના ડૂબી જવાનો ગંભીર જોખમ ઊભો થયો હતો. આ બાબતની જાણ થતા જ આસપાસના સ્થાનિક નાગરિકો મોટી સંખ્યામાં એકઠા થઈ ગયા હતા અને પશુના જીવ બચાવવા માટે તાત્કાલિક થરાદ ફાયર બ્રિગેડની ટીમને જાણ કરવામાં આવી હતી.
માહિતી મળતાની સાથે જ ફાયર બ્રિગેડના જવાનો તાત્કાલિક ઘટનાસ્થળે દોડી આવ્યા હતા અને રેસ્ક્યુ ઓપરેશન શરૂ કર્યું હતું. કેનાલના ઊંડા પાણી અને તેજ પ્રવાહ વચ્ચે ફાયર જવાનોએ ભારે જહેમત અને રેસ્ક્યુ સાધનોની મદદથી આખલાને સહીસલામત બહાર કાઢવામાં સફળતા મેળવી હતી. સમયસર કરેલી આ કામગીરીથી મૂંગા પશુનો આબાદ બચાવ થયો હતો, જેને લઈને સ્થાનિક લોકોએ રાહતનો શ્વાસ લીધો હતો અને ફાયર ટીમની સરાહના કરી હતી.
