બાયડમાં ત્રણ ઇંચ વરસાદથી પાણી પાણી; પાલિકાની કામગીરી સામે પ્રશ્નો

બાયડ શહેરમાં ગઈકાલે રાત્રે થયેલા 3 ઈંચથી વધુ વરસાદે જનજીવન અસ્તવ્યસ્ત કરી નાખ્યું છે. સૌથી વધુ અસર લાખેશ્વરી વિસ્તારમાં જોવા મળી રહી છે. નીચાણવાળા લાખેશ્વરી વિસ્તારમાં મોટા ભાગના રસ્તાઓ પર વરસાદી પાણી ભરાઈ ગયા છે. આ વિસ્તારના રહેવાસીઓ છેલ્લા ત્રણ વર્ષથી દર ચોમાસે આવી સ્થિતિનો સામનો કરી રહ્યા છે. બાયડ નગરપાલિકાએ ચોમાસા પહેલા પ્રી-મોન્સૂન કામગીરી કરી હોવાનો દાવો કર્યો હતો. પરંતુ પહેલા વરસાદમાં જ પાલિકાની કામગીરીની પોલ ખુલી ગઈ છે. વરસાદી પાણીના નિકાલની અપૂરતી વ્યવસ્થાને કારણે રસ્તાઓ પર તળાવ જેવી સ્થિતિ સર્જાઈ છે. સ્થાનિક રહેવાસીઓએ પાલિકાની કામગીરી સામે નારાજગી વ્યક્ત કરી છે. તેમની માંગ છે કે વરસાદી પાણીના નિકાલ માટે કાયમી ઉકેલ લાવવામાં આવે, જેથી દર વર્ષે આવી પરિસ્થિતિ ન સર્જાય.