પાંચ પકડાયેલ જુગારીયા સામે કાયદેસરની કાર્યવાહી
ઓગડ તાલુકાના થરા પોલીસ સ્ટેશન વિસ્તારમાં થરા બસ સ્ટેશન આજુબાજુ,પાલિકા રોડ, જુના પોલીસ ક્વાટર આજુ બાજુ આવા અનેક સ્થળોએ વરલી જુગાર, દેશી પરપ્રાંતીય દારૂ, વરલીના અડ્ડાઓ આવેલા હોવા છતાં બાહોશ પોલીસને દેખાતું નથી ત્યારે પોલીસે બાતમીના આધારે તેરવાડા ગામની સીમમાં ચાલતા જુગારના અડ્ડા પર દરોડો પાડ્યો હતો. આ દરોડામાં પાંચ ઈસમોને ઝડપી પાડવામાં આવ્યા હતા અને કુલ રૂ.16,190 નો મુદ્દામાલ જપ્ત કરવામાં આવ્યો હતો.
પોલીસ સ્ટાફ પેટ્રોલિંગમાં હતો ત્યારે તેમને બાતમી મળી હતી કે તેરવાડા ગામની સીમમાં ગંગારામ રમજી ઠાકોરના ઘર પાછળ લીમડાના ઝાડ નીચે કેટલાક લોકો પૈસાથી જુગાર રમી રહ્યા છે. આ બાતમીના આધારે પોલીસે પંચોને સાથે રાખી સ્થળ પર દરોડો પાડયો હતો.દરોડા દરમિયાન પોલીસે પાંચ ઈસમોને જુગાર રમતા રંગે હાથ ઝડપી પાડ્યા હતા. પકડાયેલા આરોપીઓમાં સોમાજી સોનાજી ઠાકોર, વિરભણજી ભુપતજી ઠાકોર, વિપુલજી ભાલાજી ઠાકોર, અરવિંદજી પુનાજી ઠાકોર અને દિલીપજી કેશાજી ઠાકોરનો સમાવેશ થાય છે. પોલીસે સ્થળ પરથી ગંજીપાના પત્તા અને ૧૬,૧૯૦ ની રોકડ રકમ જપ્ત કરી હતી. સમગ્ર કાર્યવાહી પંચોની હાજરીમાં કરવામાં આવી હતી. અને થરા પોલીસ સ્ટેશનમાં જુગારધારા કલમ-૧૨ હેઠળ ગુનો નોંધી વધુ તપાસ હાથ ધરવામાં આવી છે.
