ભાભર પોલીસ સ્ટાફ ટાઉન વિસ્તારમાં પેટ્રોલિંગ કરી રહ્યો હતો દરમિયાન પોલીસને બાતમી મળી હતી કે નવા ભાભરના માધુપુરા સ્કૂલ પાસે રહેતા રાજુભા ધનુભા રાઠોડના ઘરની આગળ લીમડાના ઝાડ નીચે કેટલાક ઈસમો ગંજીપાના તથા રોકડ રકમના દાવ સાથે તીનપત્તીનો જુગાર રમી રહ્યા છે.
બાતમીના આધારે ભાભર પોલીસે સ્થળ પર દરોડો પાડતાં જુગાર રમતા છ ઈસમો ઝડપાઈ ગયા હતા. પોલીસે સ્થળ પરથી કુલ રૂ.10,200 રોકડા કબજે કર્યા હતા. પોલીસે ઝડપાયેલા આરોપીઓની પૂછપરછ કરતાં તેમની ઓળખ રાજુભા ધનુભા રાઠોડ, પ્રહલાદજી જેતાજી ઠાકોર, કનુભા કિતુભા રાઠોડ, ટીનુભા નવુભા રાઠોડ, જેવતાભાઈ કાનજીભાઈ રાઠોડ અને મહેશભાઈ પ્રભુભાઈ માળી તરીકે થઈ હતી. આરોપીઓ પૈકી પ્રહલાદજી જેતાજી ઠાકોર અબાળા ગામના રહેવાસી છે, જ્યારે અન્ય આરોપીઓ ભાભરના રહેવાસી હોવાનું સામે આવ્યું હતું. સમગ્ર મામલે ભાભર પોલીસે તમામ છ આરોપીઓ વિરુદ્ધ જુગારધારા હેઠળ ગુનો નોંધી કાયદેસરની કાર્યવાહી હાથ ધરી છે.
