વેસ્ટર્ન ડિસ્ટર્બન્સ અને અપરએર સાયક્લોનિક સર્ક્યુલેશન સિસ્ટમ અને ટ્રફલાઇનની અસરના કારણે શુક્રવારે ઉત્તર ગુજરાતના હવામાનમાં અચાનક અસામાન્ય ફેરફાર જોવા મળ્યો હતો. પશ્ચિમ દિશાના પવન સાથે ભેજનું પ્રમાણ વધતાં ઉકળાટ અને આકરી ગરમીનો અનુભવ થયો હતો.
હવામાન વિભાગના અનુમાન મુજબ, આજે શનિવાર સાંજથી વાતાવરણમાં વધુ પલટો આવી શકે છે અને 29 અને 30 તારીખે હળવી ગાજવીજ સાથે હળવા વરસાદની શક્યતા છે. દરમિયાન, કૃષિવિભાગે સાવચેતી માટે ગાઇડ લાઇન જાહેર કરી છે અને વધુ જાણકારી કે માર્ગદર્શન માટે કિસાન કોલ સેન્ટરના ટોલ ફ્રી નંબર 1800 180 1551 ઉપર સંપર્ક કરવા જણાવાયું છે. 30 માર્ચે સાબરકાંઠા- અરવલ્લી જિલ્લામાં હળવા વરસાદની શક્યતા હવામાન વિભાગે કરી છે. શુક્રવારે દિવસ દરમિયાન સરેરાશ 11 કિલોમીટરની ઝડપે પશ્ચિમ દિશાનો પવન ફૂંકાયો હતો. જેને લઇ ભેજનું પ્રમાણ 29 થી લઇ 57 ટકાની વચ્ચે રહ્યું હતું.
