પાલનપુરમાં ટ્રાફિક નિયમનો ભંગ કરનાર વાહન ચાલકોને પોલીસે ફૂલ આપી ગાંધીગીરી કરી

પાલનપુરમાં રક્ષાબંધન પર્વ નિમિત્તે ટ્રાફિક નિયમનો ભંગ કરતા વાહન ચાલકો સામે ગાંધીગીરી કરતા ફૂલ આપી સન્માનિત કરાયા હતા. પાલનપુરમાં રક્ષાબંધનના તહેવાર ટાણે પોલીસે ટ્રાફિકના નિયમોનો ભંગ કરનાર વાહન ચાલકો સામે આજે લાલ આંખ કરવાને બદલે ફૂલ આપી તેમનું સન્માન કરવામાં આવ્યું હતું. જોકે, ફૂલ આપી ટ્રાફિકના નિયમોનું પાલન કરવાની શીખ આપતા પોલીસે હવે પછી નિયમનો ભંગ થશે તો દંડાત્મક કાર્યવાહી  કરવામાં આવશે તેમ જણાવ્યું હતું. પાલનપુરમાં રક્ષાબંધન પર્વ ને લઈ પાલનપુર ટ્રાફિક પોલીસ દ્વારા ગુરુનાનક ચોક સહિતના વિસ્તારોમાં વાહન ચેકિંગ હાથ ધરવામાં આવ્યું હતું. પરંતુ પોલીસે આજે રક્ષાબંધન ના તહેવારને લઈ ટ્રાફિક નિયમનો ભંગ કરતા જેમ કે ત્રણ સવારીમાં વાહન ચલાવતા, લાયસન્સ વગર વાહન ચલાવતા, નંબર પ્લેટ વગર વાહન ચલાવતા તેમજ કાળી ફિલ્મ લગાવીને ગાડી ચલાવતા વાહનચાલકોને રોકાવી ફૂલ આપી સન્માન કરવામાં આવ્યું હતું. અને જણાવવામાં આવ્યું હતું કે, આજે તો ફુલ આપી સન્માન કરીએ છીએ પરંતુ જો હવે પછી ટ્રાફિક નિયમનો ભંગ કરતા ઝડપાશો તો તમારી સામે કાયદેસરની કાર્યવાહી કરી દંડકીય કાર્યવાહી કરવામાં આવશે.