મહેસાણા જિલ્લાના કડી પોલીસ સ્ટેશન વિસ્તારમાં આઈપીએલ (IPL-2026) મેચ પર ઓનલાઈન સટ્ટો રમાડતા એક શખ્સને પોલીસે રંગેહાથ ઝડપી પાડ્યો છે. પોલીસને મળેલી ચોક્કસ અને ગુપ્ત બાતમીના આધારે કરણનગર બસ સ્ટેન્ડ પાસે આ સફળ રેડ કરવામાં આવી હતી.પોલીસને માહિતી મળી હતી કે કરણનગર બસ સ્ટેન્ડ પાસે જાહેરમાં એક શખ્સ પોતાના મોબાઈલ ફોન દ્વારા ચાલુ આઈપીએલ મેચ પર ઓનલાઈન સટ્ટાનું નેટવર્ક ચલાવી રહ્યો છે. આ બાતમીના આધારે પોલીસે ત્વરિત પ્લાન બનાવીને દરોડો પાડ્યો હતો અને સટ્ટો રમાડતા શખ્સને ઝડપી લીધો હતો.
પકડાયેલા આરોપીની ઓળખ ધાર્મિક ગલાજી ઠાકોર (રહે. કરણનગર ગામ) તરીકે થઈ છે. પોલીસ તપાસ અને ફરિયાદ અનુસાર, આરોપી ધાર્મિક ઠાકોર પોતાના મોબાઈલમાં WWW.Nithya.999.com નામની સટ્ટાબાજીની વેબસાઈટની લિંક ઓપન કરીને, પોતાના પર્સનલ યુઝર આઈડી અને પાસવર્ડ દ્વારા લોગ-ઈન કરી આઈપીએલની મેચો પર ઓનલાઈન હાર-જીતનો જુગાર રમાડતો અને પોતે પણ સટ્ટો લગાવતો હતો.પોલીસે ઘટનાસ્થળેથી આરોપી પાસેથી ઓનલાઈન સટ્ટો રમવા માટે ઉપયોગમાં લેવાતો સ્માર્ટફોન અને તેમાંથી મળી આવેલી સટ્ટાના હિસાબ-કિતાબની ડિજિટલ વિગતો સહિત અંદાજે ₹5,000 ની કિંમતનો મુદ્દામાલ જપ્ત કર્યો છે. કડી પોલીસે આ મામલે પકડાયેલા શખ્સ વિરુદ્ધ જુગારધારાની સંબંધિત કલમો હેઠળ ગુનો નોંધીને આગળની કાયદેસરની કાર્યવાહી હાથ ધરી છે.
