પાલનપુર પંથક પાણી પાણી; ઉપરવાસમાં ભારે વરસાદને પગલે નદી નાળા છલકાયા

પાલનપુરમાં 2 ઇંચ વરસાદમાં જુના બસ સ્ટેન્ડ સહિતના વિસ્તારોમાં પાણી ભરાયા ગુજરાતને ઘમરોળનાર મેઘરાજા એ તોફાની બેટિંગ કરતા જિલ્લા મુખ્યાલય પાલનપુર સહિત જિલ્લાભરમાં ધોધમાર વરસાદ થયો હતો. ઉપરવાસમાં ભારે વરસાદને પગલે પાલનપુર પંથકના નદી-નાળા છલકાઈ ગયા હતા. બાલારામ-ઉમરદશી-બાજોઠિયા નદી આવતા ખેડૂતોમાં ખુશીની લહેર જોવા મળી હતી. તો વળી ગોળા ગામમાં વીજળી પડતા 4 પશુઓના મોત નિપજતા ઠાકોર પરિવાર પર આભ તૂટી પડ્યું હતું. જોકે, પાલનપુરમાં માત્ર 2 ઇંચ વરસાદમાં પણ શહેરના જુના બસ સ્ટેન્ડ સહિત નીચાણવાળા વિસ્તારોમાં ઠેરઠેર પાણી ભરાઈ ગયા હતા. બનાસકાંઠા જિલ્લા મુખ્યાલય પાલનપુરમાં ગત રાત્રે કડાકા ભડાકા અને મેઘ ગર્જના સાથે મેઘરાજાનું ધમાકેદાર આગમન થયું હતું. પાલનપુર શહેર માં અસહ્ય ઉકળાટ વચ્ચે વરસાદ આવતા ગરમીમાં રાહત મળતા નગરજનોએ હાશકારો અનુભવ્યો હતો. પાલનપુર શહેર સહિત પંથકમાં વરસાદી ઝાપટા થી વાતાવરણમાં ઠંડક પ્રસરી હતી. પાલનપુર પંથકમાં મોડી રાતથી વહેલા પરોઢિયા સુધીમાં બે ઇંચ જેટલો વરસાદ ખાબક્યો હતો. વરસાદને લઈને નીચાણ વાળા વિસ્તારોમાં વરસાદી પાણી ભરાયા હતા. શહેરના ગણેશપુરા, આંબાવાડી, મફતપુરા, ગઠામણ પાટિયા, ધનિયાણા ચોકડી, જુના એસ.ટી.બસ સ્ટેન્ડ, રેલવે ગરનાળાઓ સહિત ઠેરઠેર નીચાણવાળા વિસ્તારોમાં વરસાદી પાણી ભરાતા અનેક વાહન ચાલકો અને રાહદારીઓ અટવાયા હતા.