પાલનપુરમાં ગટર લાઇટ અન્ય સોસાયટીમાં પસાર કરવાની તજવીજને લઇ સ્થાનિકોમાં રોષ

કોન્ટ્રાક્ટર -પાલિકાની મનમાની વિરૂદ્ધ જિલ્લા કલેકટરને રજૂઆત પાલનપુરમાં વોર્ડ નંબર એકમાં ભૂગર્ભ ગટર લાઈન મંજૂર કરવામાં આવી છે. જેમાં કોન્ટ્રાકટર અને પાલિકાના સત્તાધીશો દ્વારા જે જગ્યાએ ગટર લાઇન પસાર કરવાની છે તે જગ્યા બદલી અન્ય સોસાયટીમાં પસાર કરવાની તજવીજ કરવામાં આવતા સ્થાનિકો રોષે ભરાયા છે અને બનાવ અંગે કલેકટરને લેખિત રજૂઆત પણ કરવામાં આવી છે. પાલનપુરમાં વોર્ડ નંબર એકમાં સમાવિષ્ઠ મધુવન સોસાયટીમાં વરસાદી તેમજ ઘર વપરાશના ગંદા પાણીનો નિકાલ કરવા માટે પ્રકાશનગરથી લડબી નાળા સુધી ભૂગર્ભ ગટર લાઇન મંજૂર કરાઇ છે જેનો લે આઉટ પ્લાન તૈયાર થઇ ગયો છે. તેમ છતાં કોન્ટ્રાકટર અને પાલિકાના સત્તાધીશો પોતાની મનમાની ચલાવીને આ ગટર લાઇન પ્રકાશ નગરના બદલે આનંદ નગરમાંથી પસાર કરવાની તજવીજ કરવામાં આવતા આ સોસાયટીમાં ભુગર્ભમાં આવેલ ગેસ લાઇન, પાણી તેમજ ગટર લાઈન અને પ્રોટેક્શન વોલને ભારે નુકશાન થવાની ભીતિને લઇ જે સ્થળ પર ગટર લાઈન મંજૂર કરવામાં આવી છે તે જ જગ્યાએ ગટર લાઈન પસાર કરવાની માંગ સાથે સ્થાનિકો દ્વારા જિલ્લા કલેકટરને આવેદનપત્ર પાઠવવામાં આવ્યું છે.