કોઠીગામ-ભોરડુ વચ્ચે અકસ્માતથી ટ્રાફિક જામ, સદનસીબે જાનહાનિ ટળી
થરાદ-ધાનેરા હાઇવે પર કોઠીગામ અને ભોરડુ ગામ વચ્ચે પીકઅપ ગાડી અને સ્વિફ્ટ કાર વચ્ચે અકસ્માત સર્જાતા થોડા સમય માટે ટ્રાફિક જામની સ્થિતિ ઊભી થઈ હતી.મળતી માહિતી મુજબ, હાઇવે પર પસાર થઈ રહેલી પીકઅપ ગાડી અને સ્વિફ્ટ કાર વચ્ચે અચાનક ટક્કર થતાં સ્વિફ્ટ કારને ભારે નુકસાન પહોંચ્યું હતું. અકસ્માતના પગલે માર્ગ પર વાહનોની લાંબી કતારો લાગી જતાં 112 ઇમરજન્સી સેવાને જાણ કરવામાં આવી હતી.
ઘટનાની જાણ થતાં સંબંધિત ટીમ તાત્કાલિક સ્થળ પર પહોંચી હતી. અને ટ્રાફિક વ્યવસ્થા પુનઃસ્થાપિત કરવાની કામગીરી હાથ ધરી હતી. ટીમની ઝડપી કામગીરીના કારણે થોડા સમય બાદ વાહન વ્યવહાર ફરીથી સામાન્ય બન્યો હતો.સદનસીબે આ અકસ્માતમાં કોઈ જાનહાનિ કે ગંભીર ઇજા નોંધાઈ નથી. જોકે અકસ્માતના કારણે હાઇવે પરથી પસાર થતાં વાહનચાલકોને થોડો સમય હાલાકીનો સામનો કરવો પડ્યો હતો.
