સરસ્વતીના વાગડોદ પંથકના ગ્રામ્ય વિસ્તારોમાં હાલ ડીઝલની ભારે અછત સર્જાઈ છે.બીટી કપાસના વાવેતરના સમયે અછત ઊભી થઈ છે. બાજરીની કાપણીના સમયે પણ ડીઝલ મળતું નથી. ઉનાળુ મોસમનો પાક તૈયાર છે.ખેતરોમાં કાપણીનું કામ ચાલી રહ્યું છે. ખેડૂતો આગોતરી વાવણીની તૈયારીમાં છે.પરંતુ ઈંધણની તીવ્ર શોર્ટેજથી ખેડૂતો મુશ્કેલીમાં મુકાયા છે.ટ્રેક્ટર, થ્રેસર સહિતના કૃષિ મશીનો ડીઝલથી ચાલે છે.ખેતીકામ માટે ખેડૂતોને પંપે પંપે રઝળપાટ કરવો પડે છે.
કમોસમી વરસાદના માર બાદ માંડ મોઢે આવેલો ઉનાળુ પાકનો કોળિયો હવે ઈંધણ વગર છીનવાઈ જવાની ભીતિ છે. સરસ્વતીના મોટા નાયતા ગામના ખેડૂતે જણાવ્યું કે, બાજરી કઢાવવા બે કલાકથી બાઈક લઈને ડીઝલ માટે એક પંપથી બીજા પંપ સુધી ફર્યા. ડીઝલ મળ્યું નથી ઉનાળુ સીઝનમાં બાજરીની કાપણી કરીને ખેતરો માંથી સાફ કરવી છે. પાક ઘર તરફ લઈ જવો છે. ડીઝલની સખત જરૂર છે. ટ્રેક્ટર, થ્રેસર સહિતના વાહનો ડીઝલથી ચાલે છે. ચોમાસું નજીક આવી ગયું છે. ડીઝલ વગર હવે શું કરવું તે મોટો પ્રશ્ન ખેડૂતો માટે હાલમાં ઉભો થયો છે.
