ડીસા તાલુકાના રસાણા મોટા ગામે પૈસાની ઉઘરાણી બાબતે થયેલા ઝઘડામાં એક યુવક પર લોખંડની પાઇપ વડે હુમલો કરવામાં આવ્યો હતો. આ મામલે ડીસા રૂરલ પોલીસ મથકે ફરિયાદ નોંધાઈ છે. ફરિયાદી ખુશાલજી નારણજી દેલવાડીયા (ઉ.વ. 42), જે રસાણા મોટા ગામના રહેવાસી છે અને કડિયાકામ કરે છે, ફરિયાદ મુજબ, ખુશાલજી અને હેદુજી માડણજી ઠાકોર પંચાયત કચેરી આગળ ઊભા હતા ત્યારે ગામના મુકેશજી મહાદેવભાઈ કોટડીયા પોતાની ગાડી લઈને ત્યાંથી પસાર થયા હતા.
ખુશાલજીએ મુકેશજી પાસે બાકી નીકળતા પૈસાની ઉઘરાણી કરતા મુકેશજી ઉશ્કેરાઈ ગયા હતા. તેમણે ગાડીમાંથી લોખંડની પાઇપ કાઢી ખુશાલજીના માથા, પગ અને પીઠના ભાગે માર માર્યો હતો, જેના કારણે ખુશાલજી નીચે પડી ગયા હતા. હુમલા બાદ આરોપીએ ગાળો બોલી જાનથી મારી નાખવાની ધમકી આપી હતી. ઘટનાની જાણ થતાં ખુશાલજીના પરિવારજનો સ્થળ પર પહોંચ્યા હતા અને તેમને સારવાર માટે ડીસા સિવિલ હોસ્પિટલ ખસેડ્યા હતા. વધુ સારવાર માટે તેમને પાલનપુર સિવિલ હોસ્પિટલમાં રિફર કરવામાં આવ્યા હતા. ખુશાલજી એ ડીસા રૂરલ પોલીસ મથકે ફરિયાદ નોંધાવી છે. પોલીસે ગુનો નોંધી વધુ તપાસ હાથ ધરી છે.
