સેન્સ પ્રક્રિયા બાદ પ્રદેશ પાર્લામેન્ટરી બોર્ડ કરશે આખરી નિર્ણય
પાટણ જિલ્લાની સ્થાનિક સ્વરાજ્યની સંસ્થાઓમાં નવા પદાધિકારીઓની વરણી માટે પ્રદેશ ભાજપ દ્વારા નિયુક્ત નિરીક્ષકોએ બે દિવસીય બેઠક યોજી હતી. જિલ્લા ભાજપ કાર્યાલય 'કમલમ્' ખાતે ચૂંટાયેલા સદસ્યો અને સંગઠનના હોદ્દેદારો પાસેથી વન-ટુ-વન અભિપ્રાય મેળવી પ્રમુખ, ઉપપ્રમુખ અને સમિતિઓના ચેરમેન માટે નામોની પસંદગીની કવાયત હાથ ધરાઈ હતી
પ્રદેશ ભાજપ દ્વારા નિયુક્ત ત્રણ નિરીક્ષકો દિલીપ પટેલ, બાબુભાઈ જેબલિયા અને આશાબેન નકુમે આ સેન્સ પ્રક્રિયા હાથ ધરી હતી. પ્રથમ દિવસે 7 તાલુકા પંચાયત અને પાટણ નગરપાલિકા માટે બેઠકો યોજાઈ હતી. બીજા દિવસે રવિવારે જિલ્લા પંચાયત અને સિદ્ધપુર નગરપાલિકા માટે અભિપ્રાય લેવાની કામગીરી કરવામાં આવી હતી.
આ પ્રક્રિયામાં ૭ તાલુકા પંચાયતના ૯૫ સદસ્યો, પાટણ નગરપાલિકાના ૨૪ સદસ્યો, જિલ્લા પંચાયતના ૧૯ સદસ્યો અને સિદ્ધપુર પાલિકાના ૨૬ સદસ્યોએ નિરીક્ષકો સમક્ષ રૂબરૂ મળીને પોતાનો વ્યક્તિગત મત રજૂ કર્યો હતો. નિરીક્ષકો દ્વારા લેવાયેલા મંતવ્યો અને સૂચનોના આધારે જિલ્લા સંકલન બેઠકમાં દરેક પદ માટે ૩-૩ નામોની પેનલ તૈયાર કરવામાં આવશે. આ પેનલનો અહેવાલ આગામી સપ્તાહમાં પ્રદેશ પાર્લામેન્ટરી બોર્ડ સમક્ષ રજૂ કરાશે અને પ્રદેશ ચૂંટણી સમિતિની બેઠકમાં નામો પર આખરી મહોર માર્યા બાદ મેન્ડેટ જાહેર થશે અને જિલ્લાની તમામ સંસ્થાઓના નવા પદાધિકારીઓની સત્તાવાર જાહેરાત કરવામાં આવશે તેવું નિરીક્ષકોની ટીમે જણાવ્યું હતું.
