અમદાવાદની કુખ્યાત છારા ગેંગના બે શાતિર ઝડપાયા
પાલનપુરના CCTV સર્વેલન્સથી 4 અનડીટેક્ટ ગુનાઓનો ભેદ ઉકેલાયો
બનાસકાંઠા જિલ્લા સહિત રાજ્યભરમાં ફોર વ્હીલર વાહનો ના કાચ તોડી ચોરીને અંજામ આપી તરખાટ મચાવનાર ગેંગનો બનાસકાંઠા પોલીસે પર્દાફાશ કર્યો છે. પોલીસે અમદાવાદની કુખ્યાત છારા ગેંગના 2 શાતીરોને ઝડપી લઈ રૂ.2.20 લાખનો મુદ્દામાલ કબ્જે લઈ રાજ્યભર માં થયેલ ગુનાઓનો ભેદ ઉકેલી વધુ તપાસ હાથ ધરી છે.
બનાસકાંઠા જિલ્લામાં છેલ્લા કેટલાક સમયથી ફોર વ્હીલર વાહનોના કાચ તોડી રોકડ રકમ તથા કિંમતી સામાનની ચોરીના બનાવોમાં ચિંતાજનક હદે વધારો નોંધાયો હતો. દાંતા, વડગામ અને પાલનપુર તાલુકા વિસ્તારમાં બનેલા ચાર અલગ અલગ ગુના ઓમાં અજાણ્યા શખ્સો મોટર સાયકલ ઉપર આવી પાર્ક કરેલી કારોના કાચ તોડી રોકડ રકમ અને કિંમતી વસ્તુઓની ચોરી કરી ફરાર થઈ જતા પોલીસ માટે પડકાર ઉભો થયો હતો.
આ બનાવોને ગંભીરતાથી લઈ બનાસકાંઠા પોલીસ અધિક્ષક પ્રશાંત સુંબેના માર્ગદર્શન હેઠળ એલસીબી પાલનપુરની અલગ અલગ ટીમો બનાવી તપાસ હાથ ધરાઈ હતી. જે ટીમોએ ટેક્નિકલ સર્વેલન્સ, હ્યુમન ઈન્ટેલિજન્સ તથા પાલનપુર નેત્રમ શાખાના CCTV કેમેરાના આધારે તપાસ કરતા અમદાવાદની કુખ્યાત છારા ગેંગના સતીષ લાલીયા ઈન્દ્રેકર, નકુલ રાજુ તમાઈચે, પારસ ઉર્ફે પ્રફુલ ગમંડે અને જયંતી દીદાવાલાની સંડોવણી બહાર આવી હતી.ચોક્કસ બાતમીના આધારે બનાસકાંઠા એલસીબી અને અમદાવાદ ઝોન-4 એલસીબીની સંયુક્ત કામગીરીમાં અમદાવાદમાંથી સતીષ લાલીયા સરપલી ઈન્દ્રેકર (છારા) અને નકુલ રાજુભાઈ તમાઈચે (છારા)ને ઝડપી લેવાયા હતા. પોલીસ પૂછપરછમાં આરોપીઓએ દાંતા, વડગામ અને પાલનપુર તાલુકા વિસ્તારમાં કારોના કાચ તોડી થયેલી ચોરી ઓની કબૂલાત કરી હતી.
