રાત્રે ખુલ્લેઆમ દારૂ પાર્ટી, તૂટેલી બોટલો અને ગંદકીથી લોકો પરેશાન – રહેવાસીઓમાં ભય અને રોષ, કડક કાર્યવાહીની માંગ
ડીસા શહેરના રાજપુર લોધા વાસ વિસ્તારમાં કાયદો અને વ્યવસ્થાને પડકારતી ચિંતાજનક પરિસ્થિતિ સર્જાઈ રહી હોવાના આક્ષેપો રહીશોમાં ઉઠી રહ્યા છે. પોલીસ ચોકીથી નજીક આવેલા આ વિસ્તારમાં રાત્રિના સમયે અસામાજિક તત્વો દ્વારા બેફામ હરકતો કરવામાં આવતી હોવાની ફરિયાદો પણ ઉઠી રહી છે.
સ્થાનિક રહેવાસીઓના જણાવ્યા મુજબ, કેટલાક તત્વો રોજ રાત્રે લોકોના ઘરોની સામે, ઓટલાઓ અને દુકાનોની આસપાસ બેસી ખુલ્લેઆમ દારૂનું સેવન કરે છે. દારૂ પીધા બાદ ખાલી બોટલો અને કચરો ઘરઆંગણે અને દુકાનો આગળ ફેંકી દેવામાં આવતા વિસ્તાર ગંદકીથી ગંધાઈ ઉઠ્યો છે. આ પરિસ્થિતિને કારણે રહેવાસીઓમાં ભય અને અસુરક્ષાની લાગણી ફેલાઈ છે. “રાત્રે બહાર નીકળવું મુશ્કેલ બની ગયું છે, ખાસ કરીને મહિલાઓ અને વડીલો માટે સ્થિતિ વધુ ચિંતાજનક છે,” એમ એક રહેવાસીએ જણાવ્યું હતું.
સ્થાનિક વેપારીઓએ પણ આ સમસ્યાને ગંભીર ગણાવી છે. તેઓના જણાવ્યા મુજબ, દરરોજ સવારે દુકાનો આગળ તૂટેલી બોટલો અને કચરો જોવા મળે છે, જેના કારણે ગ્રાહકો પર નકારાત્મક અસર પડે છે અને વેપારને પણ નુકસાન થાય છે.રહેવાસીઓનો દાવો છે કે તેઓએ અનેક વખત પોલીસ સમક્ષ મૌખિક રજૂઆત કરી છે, છતાં હજી સુધી કોઈ અસરકારક કાર્યવાહી થઈ નથી. પોલીસ ચોકી નજીક હોવા છતાં કાયદાનો ખુલ્લેઆમ ભંગ થતો હોવા પર લોકોમાં નારાજગી વ્યાપી છે. હાલ રહેવાસીઓએ પોલીસ તંત્રને રાત્રિ પેટ્રોલિંગ વધારવા અને આવા તત્વો સામે કડક કાર્યવાહી કરવા માંગ કરી છે. લોકોમાં ચિંતા છે કે સમયસર પગલાં નહીં લેવાય તો સ્થિતિ વધુ વિકરાળ બની શકે છે.
