આગથળા-ધાનેરા સ્ટેટ હાઇવે પ્રથમ વરસાદમાં જ ધોવાઈ ગયો

લાખણી તાલુકાને ધાનેરા સાથે જોડતો આગથળા-ધાનેરા સ્ટેટ હાઇવે પહેલાં વરસાદમાં ધોવાઈ ગયો છે. અહીં રોડનું કામ પણ હજુ અધૂરું છે. જ્યાં માત્ર ડામર પાથરવાનું બાકી હતું. પરંતુ રાત્રે પડેલા વરસાદે આખું કામ બગાડી નાખ્યું છે. નીચાણવાળા વિસ્તારમાં માટી પુરણ કરી જમીન સમતલ કરાઈ હતી. ત્યારબાદ મેટલ અને કોંક્રિટ પાથરવામાં આવ્યું હતું. વરસાદ પડતાં આ બધું મટીરીયલ ધોવાઈને બાજુના ખેતરોમાં પહોંચી ગયું અને રોડ પર મોટા ખાડા પડી ગયા. અહીં ખાડા એટલા ઊંડા છે કે આખી ગાડી ખાડામાં સમાઈ જાય. સ્થાનિકોએ જણાવ્યું કે આ રોડનું કામ છેલ્લા છ મહિનાથી ચાલી રહ્યું છે. આગથળાથી ધુણસોલ સુધી જમીન સમતલ કરાઈ હતી. આ રોડ માટે ધારાસભ્ય કેશાજી ચૌહાણે સરકારમાં રજૂઆત કરી હતી. આથી ૩.૫ મીટરથી વધારીને ૭ મીટર પહોળો ડબલ લાઈન હાઇવે બનાવવાની મંજૂરી મળતાં લોકોની વર્ષો જૂની માંગણી પૂરી થઈ હતી.પરંતુ પ્રથમ વરસાદમાં રોડ ધોવાઈ જતાં લોકો હાલાકીમાં મુકાયા છે.