દાંતીવાડાના ગાંગુવાડા ગામમાં રાત્રીના સમયે એક રીંછ રહેણાંક વિસ્તારમાં ઘુસી જતાં ગામમાં દહેશતનો માહોલ ફેલાયો છે. રીંછ ઝાડ પર ચડી ગયું છે અને કલાકોથી ફોરેસ્ટ વિભાગ તેને રેસ્ક્યુ કરવા મથામણ કરી રહ્યું છે.
બનાસકાંઠા જિલ્લાના દાંતીવાડા તાલુકાના ગાંગુવાડા ગામમાં મોડી રાત્રે એક રીંછ રહેણાંક વિસ્તારમાં ઘુસી આવ્યું હતું. પ્રાથમિક અનુમાન મુજબ મધની શોધમાં રીંછ ગામમાં આવી ચડ્યું અને ઝાડ પર ચડી ગયું.અચાનક રહેણાંક વિસ્તારમાં રીંછ દેખાતાં જ આખા ગામમાં દહેશત ફેલાઈ ગઈ. લોકો પોતાના ઘરોમાં પુરાઈ ગયા. ઘટનાની જાણ થતાં જ દાંતીવાડા ફોરેસ્ટ અધિકારી વિનલ પટેલ સહિત ફોરેસ્ટ વિભાગની ટીમ તાત્કાલિક ઘટના સ્થળે દોડી આવી હતી. હાલ રીંછ ઝાડ પર જ બેઠું હોવાથી ફોરેસ્ટ વિભાગ દ્વારા છેલ્લા કેટલાક કલાકોથી રેસ્ક્યુ ઓપરેશન હાથ ધરવામાં આવ્યું છે. રીંછને પકડવાની તમામ કવાયત ચાલી રહી છે. પરંતુ કલાકોની મહેનત બાદ પણ હજુ સુધી રીંછને સલામત રીતે નીચે ઉતારી શકાયું નથી. રેસ્ક્યુમાં વિલંબ થતાં ગામના લોકોમાં ભયનો માહોલ યથાવત છે. ફોરેસ્ટ વિભાગ રીંછને સલામત રીતે પકડી જંગલ વિસ્તારમાં છોડવા માટે સતત પ્રયાસો કરી રહ્યું છે.
