ધાનેરા નજીક ઓવરલોડ રેતી ભરેલા બે હાઈવા ઝડપાયા

ધાનેરાના પ્રાંત અધિકારી દ્વારા ગેરકાયદેસર ખનન અને પરિવહનને રોકવા માટે એક મહત્વપૂર્ણ કાર્યવાહી હાથ ધરવામાં આવી છે. ફરજ દરમિયાન તેમણે બે ઓવરલોડ રેતી ભરેલા હાઈવા જપ્ત કર્યા છે. પ્રાંત અધિકારી થાવા-ધાનેરા રોડ પર સરગમ બિઝનેસ માર્કેટ પાસેથી પસાર થઈ રહ્યા હતા. ત્યારે તેમને કેટલાક શંકાસ્પદ વાહનો દેખાયા હતા. તેમણે તાત્કાલિક કાર્યવાહી કરીને તપાસ હાથ ધરી હતી. સૌ પ્રથમ, પ્રાંત અધિકારીએ GJ 08 AU 2611 નંબરના એક હાઈવાને અટકાવ્યો હતો. હાઈવાના ડ્રાઈવર દેવારામ આસુરામ જાટની પૂછપરછ કરતા જાણવા મળ્યું કે ગાડીમાં નિયમ કરતાં વધુ રેતી ભરેલી હતી. આથી, અધિકારીઓએ આ હાઈવાને તાત્કાલિક જપ્ત કરીને કાયદેસરની કાર્યવાહી શરૂ કરી હતી. આ ઉપરાંત, થોડા દિવસ અગાઉ, GJ 31 T 0695 નંબરનો અન્ય એક હાઈવા પણ પકડાયો હતો. આ હાઈવામાં માટી ભરેલી હતી અને તેની નંબર પ્લેટ  આગળ-પાછળ નંબર નહોતો, ફક્ત સાઈડમાં નંબર લખેલો હતો. ડ્રાઈવર સુરાભાઈ રોજીયાભાઈ પાસે માલસામાન લઈ જવાની કોઈ પરમિટ પણ નહોતી. તેને પણ જપ્ત કરીને કાયદેસરની કાર્યવાહી હાથ ધરવામાં આવી છે. બંને ગેરકાયદેસર હાઈવા જપ્ત થયા બાદ આગળની કાયદેસરની કાર્યવાહી માટે ખાણ અને ખનીજ વિભાગને જાણ કરવામાં આવી છે. આ કાર્યવાહી સ્થાનિક વિસ્તારમાં ગેરકાયદેસર પ્રવૃત્તિઓ પર લગામ કસવા માટે એક સકારાત્મક પગલું ગણાય છે.