રાજસ્થાન થી થરાદ જીવના જોખમે મુસાફરી; પોલીસના આંખ આડા કાન

થરાદ તાલુકો એ રાજસ્થાનની બોર્ડરની અડીને આવેલો તાલુકો છે. જ્યાં સાંચોર, બાડમેર જેવા તાલુકાઓ નજીક આવેલા હોવાથી થરાદ તાલુકો સામાજીક રીતે રાજસ્થાન સાથે જોડાયેલો છે. આથી મુસાફરોની અવર જવર માટે સરકારી બસની પણ વ્યવસ્થા કરવામાં આવી છે તો સાથે સાથે રાજસ્થાનની ખાનગી બસો પણ રાજસ્થાનથી મુસાફરો ભરીને રોજેરોજ થરાદ તરફ આવે છે. પરંતુ આ ખાનગી બસોના ડ્રાઈવર અને કંડકટર પૈસાની લાલચે બસમાં બેઠકની ક્ષમતા હોય છે તેનાથી બે ઘણા મુસાફરો બસમાં બેસાડે છે તો કેટલાક મુસાફરોને બસમાં ઊભા રાખી તેમજ બસની છત ઉપર પણ બેસાડી મુસાફરના જીવન જોખમમાં મુકી રહ્યા છે. થરાદ ચાર રસ્તા અને સરકારી હોસ્પિટલની આગળ સર્કલમાં આ તમામ બસો ઊભી રહેતી હોય છે. જોકે ત્યાં પોલીસના પોઇન્ટ મૂકેલા છે પરંતુ ટ્રાફિક પોલીસ આ મામલે આંખ આડા કાન કરી કોઈ કાર્યવાહી કરતા ન હોવાનું ચર્ચાસ્પદ બન્યું છે. પરિવહન ક્ષેત્રે સામાન્ય પ્રજાને સુવિધા પુરી પાડવામાં તંત્ર કેટલું વમણું પુરવાર થઇ રહ્યું છે જેનો વરવો પુરાવો નજરે પડે છે. રાજસ્થાનના સાંચોર, બાડમેર તરફની ખાનગી લકઝરી બસોમાં અંગ દઝાડતી કાળઝાળ ગરમીમાં શ્રમજીવી અને વિર્ધાથીઓને બસોની છતો પર મુસાફરી કરવી પડી રહી છે તંત્રની મિલીભગત અને રહેમ નજર હેઠળ બેખોફ અને બેરોકટોક રીતે આરટીઓના નિયમોને તોડી મરોડી નેશનલ હાઇવે પર ચાલતી ખાનગી લકઝરી બસોમાં ક્ષમતા કરતા વધુ મુસાફરો બસની અંદર અને એટલા જ મુસાફરો બસની છત ઉપર બેસાડી જીવના જોખમે બેસાડવામાં આવે છે.