મહેસાણા શહેરમાં છેલ્લા 24 કલાકમાં અકસ્માતની બે અલગ-અલગ ઘટનાઓ સામે આવી છે, જેમાં ટ્રક ચાલકોની બેદરકારીને કારણે દંપતી સહિત એસ.ટી. બસના કંડક્ટરને ઈજાઓ પહોંચી છે. આ બંને મામલે મહેસાણા તાલુકા પોલીસ મથકમાં કાયદેસરની ફરિયાદ દાખલ કરવામાં આવી છે.
પ્રથમ ઘટનામાં ડી-માર્ટ સર્કલ પાસે દંપતીને ટ્રકે અડફેટે લીધા
ગાંધીનગરના છત્રાલ બિલેશ્વરપુરા ખાતે રહી સિક્યુરિટી ગાર્ડ તરીકે નોકરી કરતા રમેશભાઈ ભગવાનદાસ શ્રીમાળી અને તેમના પત્ની જ્યોત્સનાબેન ગત સાંજે પોતાના વતન કામલીથી દર્શન કરીને પરત ફરી રહ્યા હતા. આ દરમિયાન મહેસાણા બાયપાસ ડી-માર્ટ સર્કલ પાસે ઊંઝા તરફથી આવી રહેલા એક ટ્રક નંબર: RJ GF 9009ના ચાલકે તેમના સ્પ્લેન્ડર મોટરસાયકલને પાછળથી જોરદાર ટક્કર મારી હતી. આ અકસ્માતમાં દંપતી રોડ પર પટાકાયું હતું, જેમાં રમેશભાઈને જમણા પગે ફેક્ચર અને તેમની પત્ની જ્યોત્સનાબેનને ડાબા પગે ગંભીર ફેક્ચર જેવી ઈજાઓ પહોંચી હતી. અકસ્માત બાદ ટ્રક ચાલક વાહન મૂકીને ફરાર થઈ ગયો હતો. 108 મારફતે ઇજાગ્રસ્તોને સારવાર અર્થે સિવિલ હોસ્પિટલ ખસેડવામાં આવ્યા હતા.
બીજી ઘટનામાં પાંચોટ ચોકડી પાસે એસ.ટી. બસ અને ટ્રક વચ્ચે અકસ્માત
અકસ્માતનો બીજો બનાવ વહેલી સવારે પાંચોટ ચોકડી પાસે બન્યો હતો. વાપી ડેપોની વાપી-ચાણસ્મા સ્લીપર કોચ બસ નંબર GJ-18-Z-8701 જ્યારે મહેસાણા રાધનપુર ચોકડીથી ચાણસ્મા તરફ જઈ રહી હતી ત્યારે પાંચોટ ચોકડી પાસે એક અજાણ્યા ટ્રક ચાલકે પૂરઝડપે આવી બસના આગળના ભાગે ટક્કર મારી હતી.
આ ટક્કર એટલી જોરદાર હતી કે, બસમાં સવાર કંડક્ટર પંકજકુમાર રાધુભાઈ મુનિયાને મોઢા અને પેટના ભાગે ગંભીર ઈજાઓ પહોંચી હતી. અકસ્માત સર્જી અજાણ્યો ટ્રક ચાલક ત્યાંથી નાસી છૂટ્યો હતો. બસના ડ્રાઈવર અરવિંદકુમાર અસોડાએ આ અંગે અજાણ્યા ટ્રક ચાલક વિરુદ્ધ ફરિયાદ નોંધાવી છે. પોલીસ આ મામલે વધુ તપાસ ચલાવી રહી છે.
