પાલનપુર શહેરના હનુમાન ટેકરી વિસ્તારમાં નાયબ કલેકટરના બંગલાની બાજુમાં આવેલા ચિનુવેલા બંગલોઝ વિસ્તારમાં ધોળા દિવસે ચોરીની ઘટના સામે આવતા ચકચાર મચી છે. બંધ મકાનને નિશાન બનાવી અજાણ્યા તસ્કરોએ તાળા તોડી ચોરીને અંજામ આપ્યો હતો.
માહિતી મુજબ પરિવાર બહાર ગયો હોઇ મોકનો લાભ ઉઠાવી બે તસ્કરો મકાનમાં ઘૂસ્યા હતા અને ચાંદીના વાસણો, રૂપિયા 4500 ની રોકડ રકમ સહિતનો મુદ્દામાલ ચોરી કરી ફરાર થઈ ગયા હતા. સમગ્ર ઘટના ત્યાં લાગેલા સીસીટીવી કેમેરામાં કેદ થઈ હોવાનું સામે આવ્યું છે. ચોરીની ઘટનાને લઈ પીડિત પરિવારે પાલનપુર પશ્ચિમ પોલીસ મથકે જાણ કરતા પોલીસ દોડી આવી હતી. પોલીસે સીસીટીવી ફૂટેજના આધારે તસ્કરોની ઓળખ મેળવવા તપાસ શરૂ કરી છે.
