"વાડ જ ચીભડાં ગળે: પાલિકાના ખર્ચે ખાનગી પ્લોટની સફાઈ ભારે પડી!"

પાલનપુર નગરપાલિકાની ભાજપની નગરસેવિકાને રૂ.5000 નો દંડ

ખાનગી પ્લોટની સફાઈ માટે નગરપાલિકાનું JCB-ટ્રેક્ટર વપરાયું હોવાની ફરિયાદ બાદ ચીફ ઓફિસરની લાલ આંખ, નોટિસ બાદ ₹5 હજારનો દંડ વસૂલાયો

ભાજપ શાસિત પાલનપુર નગરપાલિકાના વહીવટને લઈને વધુ એક વિવાદ સામે આવ્યો છે. પાલનપુર નગર પાલિકાને બાપુકી પેઢી સમજી વહીવટ કરનારા નવા નિશાળીયા સમાં નગરસેવકો માટે લાલબત્તી સમાં બનાવમાં ખાનગી પ્લોટમાં પાલિકાના સાધનો થકી સફાઈ કરાવનાર ભાજપની મહિલા નગરસેવિકા પાસેથી રૂ.5000નો દંડ વસુલવામાં આવતા પાલિકા વર્તુળોમાં ચકચાર મચી જવા પામી છે.

પ્રાપ્ત વિગતો મુજબ, પાલનપુર નગરપાલિકાના વોર્ડ નં.6ના ભાજપના સભ્ય પ્રફુલ્લાબેન કમલેશકુમાર પટેલ દ્વારા અંબિકાનગર વિસ્તારમાં આવેલા ખાનગી માલિકીના પ્લોટમાં નગરપાલિકાની બાંધકામ શાખાના ટ્રેક્ટર અને JCB મશીનનો ઉપયોગ કરીને સફાઈ કામગીરી કરાવવામાં આવી હોવાની ફરિયાદ સામે આવી હતી. જે અંગે જાગૃત નાગરિક દ્વારા કરવામાં આવેલી ફરિયાદ બાદ નગરપાલિકા તંત્ર હરકતમાં આવ્યું હતું. ખાનગી મિલકતમાં જાહેર સંસ્થાના સાધનોનો ઉપયોગ કરાયો હોવાના મુદ્દે ચીફ ઓફિસર દ્વારા સંબંધિત સભ્યને નોટિસ આપવામાં આવી હતી.