બનાસકાંઠા જિલ્લાના ઓગડ તાલુકાના મુખ્ય મથક અને વેપારી મથક થરા નગરમાં વરલી જુગાર,ઓનલાઈન ક્રિકેટ સટ્ટાબાજી તથા કેફી પદાર્થોની બદી બેફામ ફૂલીફાલી છે જેમાં યુવાધન અને કેટલાય પરિવારો બરબાદ થઇ રહ્યા છે પણ તંત્ર કુંભકર્ણ નિંદ્રામાં પોઢ્યું હોય તેવું લાગી રહ્યું છે ત્યારે થરા બસ સ્ટેશન અને કેટલાક જાહેર સ્થળોએ ચાલતી આ બદી હરતી ફરતી બાહોશ પોલીસને દેખાતી નથી.પણ અચાનક કોઈએ થરા પોલીસને બાતમી આપતા થરમાં ઓનલાઈન ક્રિકેટ સટ્ટાબાજીનો પર્દાફાશ થયો છે.
જાણવા મળતી માહિતી અનુસાર થરાની ગોકુલનગર સોસાયટીમાં રહેતા વેપારી કૌશલ રમેશચંદ્ર ઠક્કર (ઉ.વ.૩૨) પોતાના મોબાઈલ ફોન પર ઓનલાઈન ક્રિકેટ મેચમાં હારજીતનો જુગાર રમતા ઝડપાયા હતા. પોલીસે તેમની પાસેથી સટ્ટા માટે ઉપયોગમાં લેવાતો મોબાઈલ ફોન જપ્ત કર્યો છે.પોલીસને મળેલી બાતમીના આધારે કૌશલ ઠક્કરની તપાસ કરવામાં આવી હતી. તેમની પાસેથી ઓપો કંપનીનો કાળા રંગનો મોબાઈલ ફોન મળી આવ્યો હતો. મોબાઈલની તપાસ દરમિયાન, વોટ્સએપમાં 'R.R.R.' નામથી સેવ કરાયેલા નંબર પરથી www.mrmexch.com ની ઓનલાઈન સટ્ટાબાજીની લિંક મળી હતી.આ લિંક ખોલતા ક્રિકેટ મેચના લાઈવ સોદા, હારજીતના વિકલ્પો અને ઓનલાઈન આઈ.ડી. સક્રિય હાલતમાં જોવા મળ્યા હતા.પોલીસે તેમની સામે ગુનો નોંધી તપાસ હાથ ધરી છે.
