વર્ષો જૂનો રસ્તો ખુલ્લો થતા લોકોને હાશકારો
ડીસા શહેરમાં ગેરકાયદેસર દબાણો કરનારાઓ સામે નગરપાલિકા દ્વારા લાલ આંખ કરવામાં આવી છે. શહેરના હરિઓમ સ્કૂલ પાછળ તેમજ ભારત માતા પાર્ક તરફ જવાના મુખ્ય માર્ગ પર લાંબા સમયથી જમાવી દેવાયેલું વધુ એક પાકું દબાણ પાલિકાની ટીમ દ્વારા તોડી પાડવામાં આવ્યું છે. પોલીસના ચુસ્ત બંદોબસ્ત સાથે કરવામાં આવેલી આ કામગીરીને પગલે દબાણકર્તાઓમાં ફફડાટ વ્યાપી ગયો છે.
મળતી વિગતો મુજબ, હરિઓમ સ્કૂલ પાછળ અને ભારત માતા પાર્ક જવાના રસ્તા પર દબાણદારોએ લાંબા સમયથી ગેરકાયદેસર કબજો જમાવ્યો હતો. જેના કારણે સ્થાનિકો અને વાહન ચાલકોને ભારે હાલાકીનો સામનો કરવો પડતો હતો. અગાઉ પણ પાલિકા તંત્ર દ્વારા આ વિસ્તારમાં ઓપરેશન હાથ ધરીને અંદાજે ૨૪૦૦ ચોરસ મીટર જેટલી કિંમતી જગ્યા ખુલ્લી કરાવવામાં આવી હતી. ત્યારબાદ મંગળવારે પાલિકાની ટીમ પોલીસ કાફલા સાથે ઘટનાસ્થળે પહોંચી હતી. અને બાકી રહેલું વધુ એક પાકું દબાણ જેસીબી મશીન વડે તોડી પાડ્યું હતું. આ કામગીરી દરમિયાન કોઈ અનિચ્છનીય બનાવ ન બને તે માટે ચુસ્ત પોલીસ બંદોબસ્ત તૈનાત રાખવામાં આવ્યો હતો. દબાણ મુક્ત થતાં જ વર્ષો જૂનો આ આખો રસ્તો હવે સંપૂર્ણપણે ખુલ્લો થઈ ગયો છે.આ સરાહનીય કામગીરીમાં ડીસા શહેર મામલતદાર ડી. એન. બધેકા, પાલિકા ચીફ ઓફિસર ચંદ્રકાન્ત દેસાઈ, તેમજ દબાણ શાખાના મનોજભાઈ પટેલ અને દેવરામભાઈ માળી સહિત નગરપાલિકાનો અન્ય સ્ટાફ હાજર રહ્યો હતો. પાલિકાની આ આક્રમક કામગીરીથી સ્થાનિક રહીશોએ રાહતનો શ્વાસ લીધો છે અને તંત્રના આ પગલાંને બિરદાવ્યું છે.
