"સાબરકાંઠાના હિંમતનગરમાં વાતાવરણમાં મોટો પલટો જોવા મળ્યો છે. ભરઉનાળે જાણે ચોમાસું બેઠું હોય તેમ, બપોર બાદ અચાનક આકાશ કાળા ડિબાંગ વાદળોથી ઘેરાઈ ગયું હતું. હિંમતનગર શહેર સહિત આસપાસના ગ્રામ્ય વિસ્તારોમાં તેજ ગતિએ પવન ફૂંકાયો અને વીજળીના કડાકા-ભડાકા સાથે કમોસમી વરસાદનું ઝાપટું પડ્યું છે. એક તરફ ગરમીથી રાહત મળી છે, તો બીજી તરફ આ માવઠાને કારણે તૈયાર થયેલા ઉનાળુ પાકને લઈને ખેડૂતોમાં ભારે ચિંતા જોવા મળી રહી છે."
