અરવલ્લી જિલ્લાના સુપ્રસિદ્ધ યાત્રાધામ શામળાજી નજીક આવેલા ઓડ ગામે ગઈકાલે સાંજે પશુ ચરાવવા ગયેલા એક ૧૨ વર્ષીય નિર્દોષ બાળકનો અચાનક પગ લપસી જતાં તળાવના ઊંડા પાણીમાં ગરકાવ થઈ જવાની અત્યંત કરુણ ઘટના સામે આવી છે. પ્રાપ્ત વિગતો અનુસાર, બાળક ગઈ કાલ સાંજથી લાપતા બનતાં પરિવારે ભારે શોધખોળ હાથ ધરી હતી, જે દરમિયાન બાળક તળાવમાં ડૂબી ગયું હોવાની આશંકા સેવાતાં મોડાસા નગરપાલિકાની ફાયર બ્રિગેડની ટીમને જાણ કરવામાં આવી હતી.
આ બનાવની ગંભીરતાને ધ્યાને લઈ મોડાસા ફાયર ફાયટરોએ તાબડતોબ ઘટનાસ્થળે પહોંચી આજે સવારે તળાવમાં સઘન રેસ્ક્યુ ઓપરેશન હાથ ધરી બાળકના મૃતદેહને બહાર કાઢ્યો હતો. કાળજાના કટકા સમાન માસૂમ પુત્રના અકાળે મોતથી પરિવારજનોમાં ભારે આક્રંદ અને સમગ્ર પંથકમાં ઘેરા શોકની લાગણી વ્યાપી ગઈ છે, જ્યારે શામળાજી પોલીસે ઘટનાસ્થળે પહોંચી મૃતદેહને પીએમ અર્થે ખસેડી કાયદેસરની વિધિસર કાર્યવાહી હાથ ધરી છે.
