સાબરકાંઠા જિલ્લાના મુખ્યાલય હિંમતનગર શહેરમાંથી આગની એક મોટી ઘટના સામે આવી છે. અહીં રેલવે અન્ડરપાસ પાસે ઇન્દ્રનગર અને મહાવીરનગરને જોડતા મહત્વના રસ્તા નજીક આગ લાગવાની ઘટના બની છે. આ વિસ્તારમાં માત્ર પંદર જ દિવસમાં આગ લાગવાની આ બીજી ઘટના બનતા સ્થાનિક રહીશોમાં ભારે ફફડાટ અને ચિંતા ફેલાઈ ગઈ છે.
ઘટનાસ્થળેથી આકાશમાં આગના કારણે ધુમાડાના કાળા ડિંબાંગ ગોટેગોટા દૂર-દૂર સુધી જોવા મળ્યા હતા, જેને લઈને આસપાસના લોકોમાં દોડધામ મચી ગઈ હતી. અવારનવાર આગ લાગવાની આ પ્રકારની ઘટનાઓથી સ્થાનિક નાગરિકોમાં તંત્ર સામે પણ રોષ જોવા મળી રહ્યો છે. હાલ આ ઘટના અંગેની વધુ વિગતો અને નુકસાનની માહિતી મેળવવામાં આવી રહી છે.
