હિંમતનગર શહેરમાં એન્ટી નાર્કોટિક્સ ટાસ્ક ફોર્સ (ANTF) દ્વારા બાતમીના આધારે કાર્યવાહી કરીને ગાંજા અને ચરસના જથ્થા સાથે ત્રણ શખ્સોને ઝડપી લેવામાં આવ્યા છે. આ મામલે કુલ ચાર વ્યક્તિઓ વિરુદ્ધ NDPS (નાર્કોટિક ડ્રગ્સ એન્ડ સાયકોટ્રોપિક સબસ્ટન્સીસ) એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.
મળતી વિગતો મુજબ, ANTFની ટીમે ચોક્કસ માહિતીના આધારે હિંમતનગર વિસ્તારમાં વોચ ગોઠવી કાર્યવાહી હાથ ધરી હતી. તપાસ દરમિયાન આરોપીઓ પાસેથી અંદાજે ₹21,815 ની કિંમતનો ગાંજો અને ચરસનો મુદ્દામાલ મળી આવ્યો હતો. ટીમે આ નશીલા પદાર્થનો જથ્થો જપ્ત કરી ત્રણ આરોપીઓને સ્થળ પરથી દબોચી લીધા હતા, જ્યારે આ નેટવર્ક સાથે સંકળાયેલા અન્ય એક શખ્સ સહિત કુલ ચાર સામે ગુનો દાખલ કરાયો છે. જિલ્લામાં નશીલા પદાર્થોના દૂષણને ડામવા માટે પોલીસ અને ANTF દ્વારા સતત તપાસ અને કાર્યવાહી કરવામાં આવી રહી છે. ઝડપાયેલા આરોપીઓ આ જથ્થો ક્યાંથી લાવ્યા હતા અને કોને સપ્લાય કરવાના હતા, તે અંગે ઊંડાણપૂર્વક પૂછપરછ અને તપાસ ચાલી રહી છે.





