ગરીબોના બેંક ખાતા ખોલાવી સાયબર ફ્રોડ કરતી ગેંગ
મહેસાણા જિલ્લાના જોટાણા પંથકમાં ભોળા અને ગરીબ લોકોને આર્થિક લાલચ આપી તેમના નામે બેંક ખાતા ખોલાવી, તેનો ઉપયોગ સાયબર ગુનાઓ માટે કરતી આંતરરાજ્ય ટોળકીનો સાંથલ પોલીસે પર્દાફાશ કર્યો છે. સાંથલ પી.આઈ. કે.કે. ચૌધરી અને તેમની ટીમે સચોટ બાતમીના આધારે જોટાણા બસ સ્ટેન્ડ પાસેથી બે શખ્સોને રંગેહાથ ઝડપી પાડ્યા છે. પકડાયેલા આરોપીઓમાં સાવનજી પારખાનજી ઠાકોર (રહે. ઈજપુરા) અને નિકુલકુમાર બાબુલાલ વાળંદ (રહે. બહુચરાજી) નો સમાવેશ થાય છે.
આ આરોપીઓ છેલ્લા એક વર્ષથી સક્રિય હતા અને સ્થાનિક લોકોને ₹૧૦,૦૦૦ થી ₹૧૨,૦૦૦ ની લાલચ આપી ગુજરાત ગ્રામીણ બેંક અને બેન્ક ઓફ મહારાષ્ટ્રમાં ખાતા ખોલાવતા હતા. ખાતું ખુલ્યા બાદ તેઓ પાસબુક, ડેબિટ કાર્ડ અને સીમકાર્ડ મેળવી દિલ્હીના ‘હેરી’ અને રાજસ્થાનના ‘વિકાસ’ નામના મુખ્ય સૂત્રધારોને કુરિયર મારફતે મોકલી આપતા હતા. આરોપી નિકુલ વાળંદને એક કીટ મોકલવા બદલ ₹૧૫,૦૦૦ મળતા હતા, જેમાંથી ₹૫,૦૦૦ તે કમિશન રાખતો હતો. દિલ્હીના સાગરિતો આ વિગતોથી ઓનલાઈન ઠગાઈ આચરતા હતા.
નેશનલ સાયબર ક્રાઈમ રિપોર્ટિંગ પોર્ટલ (NCCRP) ની તપાસમાં આ ટોળકીના તાર દેશના અન્ય રાજ્યો સાથે જોડાયેલા હોવાનું બહાર આવ્યું છે. આરોપી સાવનજીના બેંક ખાતામાં બિહારના પટણામાં અંદાજે ₹૬૬.૪૯ લાખ અને નિકુલ વાળંદના ખાતાઓમાં તેલંગાણા તથા મહારાષ્ટ્રમાં ₹૩૬-૩૬ લાખની ઓનલાઈન છેતરપિંડીની ફરિયાદો નોંધાઈ છે. પોલીસે આરોપીઓ પાસેથી ₹૫૫,૦૦૦ ની કિંમતનો મુદ્દામાલ જપ્ત કર્યો છે, જેમાં ૩ મોબાઈલ, ૪ ડેબિટ કાર્ડ, ૩ પાસબુક, ૪ સીમકાર્ડ, ૧ લેપટોપ અને એક મહત્વની હિસાબી ડાયરી મળી આવી છે. સાંથલ પોલીસે પકડાયેલા બંને આરોપીઓ અને ફરાર વિકાસ તથા હેરી વિરુદ્ધ ભારતીય ન્યાય સંહિતા (BNS) અને આઈ.ટી. એક્ટ હેઠળ ગુનો નોંધી આગળની તપાસ તેજ કરી છે. આ ઘટના બેંકોની KYC પ્રક્રિયા અને કુરિયર એજન્સીઓની સુરક્ષા સામે પણ ગંભીર સવાલો ઉભા કરે છે.
