સાબરકાંઠા; પશુપાલકોએ અનોખી રીતે અવાજ ઉઠાવ્યો ચાલકો અને મુસાફરોને મફત દૂધનું વિતરણ કર્યું

સાબરકાંઠા અને અરવલ્લી જિલ્લામાં પશુપાલકો દ્વારા સાબરડેરી સામે વિરોધનો દોર શરૂ થયો છે. પશુપાલકોની માગણી છે કે દૂધના પ્રતિ કિલો ફેટના ભાવમાં વધારો કરવામાં આવે. આ વિરોધ દરમિયાન હિંમતનગર તાલુકાના રાજેન્દ્રનગર ગામના પશુપાલકોએ અનોખી રીતે પોતાનો અવાજ ઉઠાવ્યો છે. તેમણે દૂધને વ્યર્થ વહેવડાવવાને બદલે તેનો સદઉપયોગ કરવાનું નક્કી કર્યું. રાજેન્દ્રનગર ગામની ડેરીના સભ્યોએ દૂધને કોથળીઓમાં ભરી ટ્રેક્ટર ટ્રોલીમાં લઈ નેશનલ હાઈવે પર પહોંચ્યા. અહીં તેમણે પસાર થતા ટ્રક ચાલકો, અન્ય વાહન ચાલકો અને મુસાફરોને મફત દૂધનું વિતરણ કર્યું. આ અગાઉ બંને જિલ્લાના વિવિધ તાલુકાઓમાં આવેલી દૂધ મંડળીઓએ સાબરડેરીમાં દૂધ ન ભરાવીને વિરોધ નોંધાવ્યો હતો. કેટલાક સ્થળોએ પશુપાલકોએ દૂધની નદીઓ વહેવડાવી હતી.