ડીસામાં ફિટ ઇન્ડિયા મૂવમેન્ટ અંતર્ગત પોલીસ દ્વારા સાયકલ રેલીનું આયોજન

બનાસકાંઠા જિલ્લા પોલીસ અને ડીસા ડિવિઝન દ્વારા 'સન્ડે ઓન સાયકલ' કાર્યક્રમ અંતર્ગત 'ફિટ ઇન્ડિયા મૂવમેન્ટ'ને પ્રોત્સાહન આપવા માટે એક સાયકલ રેલીનું આયોજન કરવામાં આવ્યું હતું. આ રેલી રવિવારે સવારે ૬ વાગ્યે ડીસાની ડી.એન.પી. કોલેજથી શરૂ થઈ હતી. આ સાયકલ રેલીમાં પોલીસ અધિકારીઓ અને કર્મચારીઓ સહિત અનેક નાગરિકો ઉત્સાહભેર જોડાયા હતા. રેલી ડી.એન.પી. કોલેજથી શરૂ થઈને રસાણા ગામ, સ્પાર્કલિંગ ખાટ, કાંટ અને અજાપુરા ગામ થઈને ડીસા રૂરલ પોલીસ સ્ટેશન ખાતે સમાપ્ત થઈ હતી. આ પ્રસંગે રસાણા ખાતે ચા-નાસ્તાનો વિરામ પણ લેવામાં આવ્યો હતો. પોલીસ દ્વારા આયોજિત આ કાર્યક્રમનો મુખ્ય ઉદ્દેશ્ય લોકોને શારીરિક સ્વાસ્થ્ય અને ફિટનેસ પ્રત્યે જાગૃત કરવાનો હતો, જેનાથી સ્વસ્થ સમાજનું નિર્માણ થઈ શકે. આ સાયકલ રેલીને લોકોનો સારો પ્રતિસાદ મળ્યો હતો.