એલ.સી.બી. પોલીસે રૂ. 20,000 નો મુદ્દામાલ જપ્ત કર્યો
બનાસકાંઠા એલ.સી.બી. પોલીસે ડીસા શહેર ઉત્તર પોલીસ સ્ટેશન વિસ્તારમાંથી ઓનલાઇન ક્રિકેટ સટ્ટો રમતાં એક શખ્સને પોલીસે ઝડપી પાડ્યો છે. પોલીસે જુગારના સાહિત્ય સહીત કુલ રૂ. 20,000 નો મુદ્દામાલ જપ્ત કર્યો છે. એલ.સી.બી. સ્ટાફ ડીસા શહેર ઉત્તર પોલીસ સ્ટેશન વિસ્તારમાં પેટ્રોલિંગ કરી રહ્યો હતો. તે દરમિયાન બાતમીના આધારે ડીસા નવા બસ સ્ટેશનથી બગીચા સર્કલ તરફ જતાં આદર્શ હાઇસ્કૂલ સામેથી રાહુલસિંગ નટવરસિંગ રાજપૂત (રહે. લાલચાલી, તેરમીનાળા, ગણપતિ મંદિર પાસે, ડીસા) નામના શખ્સને ઝડપી પાડ્યો હતો.
આરોપી રાહુલસિંગ લાયસન્સ કે પરવાના વિના 'AII panelexch9.com' નામની આઇ.ડી. નો ઉપયોગ કરીને આઇ.પી.એલ. ની ચાલતી લાઇવ T-20 મેચ પર ક્રિકેટ સટ્ટો રમી રહ્યો હતો. તેની પાસેથી એક મોબાઇલ ફોન સહીત રૂ. 20,000 નો મુદ્દામાલ જપ્ત કરવામાં આવ્યો છે.
બનાસકાંઠા રેન્જના પોલીસ મહાનિરીક્ષક પરીક્ષિતા રાઠોડ અને જીલ્લા પોલીસ અધિક્ષક પ્રશાંત સુંબે દ્વારા દારૂ અને જુગારની પ્રવૃત્તિઓ નેસ્તનાબૂદ કરવા કડક અમલવારીની સુચનાઓ આપવામાં આવી હતી. આ સુચનાઓના અનુસંધાનમાં એલ.સી.બી. પોલીસ ઇન્સ્પેક્ટર એ.વી. દેસાઇના માર્ગદર્શન હેઠળ આ કાર્યવાહી કરવામાં આવી હતી. ઝડપાયેલા શખ્સ સામે ડીસા ઉત્તર પોલીસે ગુનો નોંધી વધુ તપાસ હાથ ધરી છે.
