પાટણ; પોલીસ, ફાયર અને એમ્બ્યુલન્સની સેવાઓ, 16 વાહનોને લીલીઝંડી

પાટણ જિલ્લામાં આજે ઇમર્જન્સી રિસ્પોન્સ સેવાનો શુભારંભ થયો છે. હવે જિલ્લાના નાગરિકો પોલીસ, ફાયર અને એમ્બ્યુલન્સની સેવાઓ માટે માત્ર 112 નંબર પર કૉલ કરી શકશે. આ સેવા માટે જિલ્લામાં 16 ઇમર્જન્સી રિસ્પોન્સ વાહનો ફાળવવામાં આવ્યા છે. જિલ્લા પોલીસ અધિક્ષક કચેરી ખાતે યોજાયેલા કાર્યક્રમમાં નાયબ પોલીસ અધિક્ષક ડી.ડી.ચૌધરી અને 112 સેવાના નોડલ અધિકારીએ ERV વાહનોને લીલી ઝંડી બતાવી. આ વાહનો જિલ્લાના તમામ પોલીસ સ્ટેશન વિસ્તારમાં તૈનાત કરવામાં આવ્યા છે. અધિકારીઓએ જણાવ્યું કે આધુનિક સુવિધાઓથી સજ્જ આ વાહનો કટોકટીના સમયે તુરંત ઘટનાસ્થળે પહોંચશે. આ સેવા જિલ્લામાં કાયદો અને વ્યવસ્થા જાળવવામાં તેમજ નાગરિકોની સુરક્ષા સુનિશ્ચિત કરવામાં મહત્વપૂર્ણ ભૂમિકા ભજવશે.