પુનઃમૂલ્યાંકનમાં બોગસ ઉત્તરવહીઓથી પાસ કરાવવાના કેસમાં રિમાન્ડ પૂરા થતાં કોર્ટનો આદેશ
પાલનપુરના તિરૂપતિ રાજનગર હાઇવે પર રહેતા 27 વર્ષના પાર્થ અશોકભાઈ કસ્તુરચંદ મહેશ્વરીની 27/10/2026ના રોજ ધરપકડ કરી હતી. તેને પાટણ કોર્ટમાં રજૂ કરતાં 2/11/2026 સુધીના રિમાન્ડ મળ્યા હતા. રિમાન્ડ પૂરા થતાં મેજિસ્ટ્રેટે તેને જ્યુડિશિયલ કસ્ટડીમાં મોકલવાનો હુકમ કર્યો હતો.
પોલીસે રિમાન્ડ માગતી વખતે કહ્યું હતું કે પાર્થએ પોતાના બેઠક નંબરવાળી ઉત્તરવહી જાતે લખી હતી કે અન્ય કોઈ પાસે લખાવી હતી,તેની તપાસ બાકી છે. યુનિવર્સિટીના કયા કર્મચારી સાથે તેની ઓળખાણ હતી અને કોના મારફતે સંપર્ક થયો હતો, તે પણ તપાસવામાં આવી રહ્યું છે.પરીક્ષામાં પાસ કરાવવા કોણે ભૂમિકા ભજવી અન્ય નાપાસ વિદ્યાર્થીઓ સાથે મળીને અસલ ઉત્તરવહીઓ બદલવાનું કાવતરું ક્યાં ઘડાયું અને નવી ઉત્તર વહીઓ ક્યાંથી લવાઈ, તેની તપાસ ચાલુ છે. અસલ ઉત્તરવહીઓનો નાશ કેવી રીતે કરાયો અને ગુમ થયેલી ઉત્તરવહીઓ ક્યાં છે, તે શોધીને કબજે કરવાની કાર્યવાહી પણ તપાસ હેઠળ છે.પુનઃમૂલ્યાંકનમાં બેઠક નંબર 391, 392 અને 406 ધરાવતા વિદ્યાર્થીઓની અસલ ઉત્તરવહીઓ બદલીને ખોટો એસેસમેન્ટ રેકોર્ડ તૈયાર કરાયો હોવાનું સામે આવ્યું હતું. આ કેસમાં કુલ છ આરોપીઓ છે. અગાઉ પરિમલ પટેલ, કનુ ચૌધરી અને રાજદીપ કોડીયાતરની ધરપકડ થઈ હતી.
