શાસ્ત્રી મોટર બોડી સામે જોખમી રીતે પાર્ક કરેલ ટ્રક ચાલક સામે ગુનો નોંધાયો
સિદ્ધપુર-પાલનપુર હાઈવે પર શાસ્ત્રી મોટર બોડી સામે રોંગ સાઈડમાં ઉભેલી ટ્રક સાથે બાઈક અથડાતાં અને આ ગંભીર અકસ્માતમાં બાઈક ચાલક નું ઘટનાસ્થળે જ મોત થતાં સિદ્ધપુર પોલીસ સ્ટેશનમાં ટ્રક ચાલક સામે ગુનો નોંધાયો છે. પાટણ જિલ્લાના સિદ્ધપુર પોલીસ સ્ટેશન વિસ્તારમાંથી પસાર થતા પાલનપુર હાઈવે પર ગઈકાલે સાંજે 5:30 થી 6:00 વાગ્યાની આસપાસ આ અકસ્માત થયો હતો.સિદ્ધપુર ખાતે શાસ્ત્રી મોટર બોડી સામે ટ્રક નંબર GJ.24.V.64 88 ના ચાલકે પોતાનું વાહન રોંગ સાઈડમાં, અડધું રોડ પર અને અડધું રોડની સાઈડમાં જોખમી રીતે ઊભું રાખ્યું હતું. આ સમયે ત્યાંથી પસાર થઈ રહેલા બાઈક ચાલકનું વાહન ઉભેલી ટ્રક સાથે અથડાયું. આ ગંભીર ટક્કરમાં બાઈક ચાલકને ગંભીર ઈજાઓ થઈ અને તેનું મોત નીપજ્યું.
આ ઘટના અંગે રાજસ્થાનના પાલી જિલ્લાના સોઝત તાલુકાના બગડી નગરના વતની ચંપાલાલ રામલાલ પુખરાજ પ્રજાપતિ (ઉંમર 41) એ સિદ્ધપુર પોલીસ સ્ટેશનમાં ફરિયાદ નોંધાવી છે.ચંપાલાલ હાલ સિદ્ધપુર હાઈવે પર એચ.પી. પેટ્રોલ પંપની પાસે આવેલી બાબા રામદેવ હોટલ જ્યોતિ ટાયર ખાતે રહે છે અને મજૂરી કામ કરે છે. આ ફરિયાદના આધારે સિદ્ધપુર પોલીસે ટ્રક નંબર GJ.24.V.6488 ના ચાલક સામે ગુનો દાખલ કર્યો છે. આ અકસ્માતની વધુ તપાસ સિદ્ધપુર પોલીસ સ્ટેશનના પીઆઈ એમ.કે. ઝાલા કરી રહ્યા છે.
