મહેસાણા; કડિયાકામ કરતા મજૂરો પર લૂંટારુઓનો હુમલો પોલીસે ગણતરીના કલોકોમાં પકડી પાડ્યા

કડી તાલુકાના નંદાસણ પોલીસ સ્ટેશન વિસ્તારમાં જોટાણા તાલુકાના ધોળાસણ પ્રાથમિક શાળામાં ગંભીર ઘટના સામે આવી છે. શાળામાં કડિયાકામ કરતા રાજસ્થાની મજૂરો પર ત્રણ લૂંટારુઓએ રાત્રે હુમલો કર્યો હતો. ઘટના દરમિયાન મજૂરો સુરેશ કટારા, સીતારામ અને વિકલેશ શાળામાં જ રાત્રે સૂઈ રહ્યા હતા. અચાનક શાળામાંથી ખડભડાટનો અવાજ આવતા સુરેશ કટારા જાગી ગયા હતા. તેમણે જોયું કે સીતારામ અને વિકલેશે એક શખ્સને પકડી રાખ્યો હતો. સીતારામ અને વિકલેશે જણાવ્યું કે ત્રણ શખ્સો ચોરી કરવા આવ્યા હતા અને તેમના મોબાઈલ ફોન લૂંટી લીધા હતા. એક શખ્સને પકડી લેતા બાકીના બે લૂંટારુઓએ છરી વડે હુમલો કર્યો હતો. હુમલામાં બંને મજૂરોને ઈજા થતાં તેમને 108 એમ્બ્યુલન્સ મારફતે કડીની ભાગ્યોદય હોસ્પિટલમાં ખસેડવામાં આવ્યા હતા. બે લૂંટારુઓ મોબાઈલ અને બાઈક લઈને ફરાર થઈ ગયા હતા. ઘટનાની જાણ થતાં નંદાસણ પોલીસનો કાફલો અને ગ્રામજનો ઘટનાસ્થળે પહોંચ્યા હતા. પોલીસે ત્રણેય લૂંટારુઓ સામે લૂંટ અને ચોરીનો ગુનો નોંધી કાયદેસરની કાર્યવાહી શરૂ કરી છે.