મહેસાણા નગરપાલિકામાંથી મહાનગરપાલિકા (મનપા) બન્યા બાદ હવે શહેરને તેના પ્રથમ ઐતિહાસિક મેયર મળવા જઈ રહ્યા છે. મનપાની ચૂંટણી પ્રક્રિયા પૂર્ણ થયાના એક મહિના જેટલા લાંબા સમય બાદ આખરે વહીવટી તંત્ર દ્વારા મેયર અને ડેપ્યુટી મેયરની વરણી માટેની સત્તાવાર જાહેરાત કરવામાં આવી છે. આગામી ૨૬ મેના રોજ બપોરે ૧:૦૦ વાગ્યે મહાનગરપાલિકાની પ્રથમ સામાન્ય સભા યોજાશે, જેમાં શહેરના પ્રથમ નાગરિકના નામ પર મહોર મારવામાં આવશે.
મહેસાણા મહાનગરપાલિકાના નિયમો અને રોટેશન મુજબ પ્રથમ ટર્મ માટે મેયરનું પદ મહિલા માટે અનામત રાખવામાં આવ્યું છે. આ કારણે મહેસાણાને તેના ઇતિહાસના પ્રથમ નાગરિક તરીકે એક મહિલા મેયર મળશે. ચૂંટણીના પરિણામો આવી ગયા હોવા છતાં એક મહિના સુધી મેયરના નામ પર સસ્પેન્સ જળવાઈ રહ્યું હતું, જે હવે ૨૬ મેના રોજ સામાન્ય સભામાં સત્તાવાર રીતે ખુલ્લું થશે. મેયરની સાથે સાથે ડેપ્યુટી મેયર અને સ્થાયી સમિતિ (સ્ટેન્ડિંગ કમિટી)ના ચેરમેનના નામની પણ જાહેરાત કરવામાં આવશે.
મહેસાણા મનપાના કમિશનર અને વહીવટી તંત્ર દ્વારા તમામ નવનિર્વાચિત કોર્પોરેટરોને સામાન્ય સભાનું એજન્ડા વિતરણ કરી દેવામાં આવ્યું છે. ૨૬ મેના રોજ બપોરે બરાબર ૧ વાગ્યે મળનારી આ પ્રથમ સામાન્ય સભા પર માત્ર મહેસાણા જ નહીં, પરંતુ સમગ્ર ઉત્તર ગુજરાતની નજર મંડાયેલી છે. શાસક પક્ષ દ્વારા મેયર અને અન્ય હોદ્દેદારોના નામનું મેન્ડેટ (વ્હીપ) સામાન્ય સભાના થોડા સમય પહેલાં જ જાહેર કરવામાં આવે તેવી પૂરેપૂરી શક્યતા છે.
મહેસાણા શહેરનો મહાનગરપાલિકામાં સમાવેશ થયા બાદ આ પ્રથમ બોર્ડની રચના થઈ રહી છે. પ્રથમ મહિલા મેયર અને ડેપ્યુટી મેયરની વરણી થતાં જ મનપાનું શાસન વિધિવત રીતે ચૂંટાયેલી પાંખના હાથમાં આવી જશે. નવા હોદ્દેદારો સામે શહેરના રોડ-રસ્તા, પાણી, ડ્રેનેજ અને ટ્રાફિક જેવા પાયાના પ્રશ્નો ઉકેલીને મહેસાણાને સાચા અર્થમાં 'મહાનગર' બનાવવાનો મોટો પડકાર અને તક બંને રહેશે.
