બનાસકાંઠા જિલ્લામાં છેલ્લા કેટલાય દિવસોથી શરૂ થયેલી ડીઝલની અછત હવે વધુ વિકટ બની ગઈ છે. જિલ્લાના ખાસ કરીને પાંથાવાડા અને દાંતીવાડા વિસ્તારમાં પરિસ્થિતિ એટલી હદે વણસી છે કે ડીઝલનો જથ્થો ખૂટી પડતાં અનેક પેટ્રોલ પંપો ફરજિયાતપણે બંધ રાખવાની નોબત આવી છે. પંપો પર 'ડીઝલ નથી' ના બોર્ડ લટકી જતાં સ્થાનિક અર્થતંત્રના મુખ્ય આધાર એવા ખેતી અને પશુપાલન ક્ષેત્ર પર તેની ગંભીર અસરો જોવા મળી રહી છે.
ખેતી અને પશુપાલન પર સીધો પ્રહાર
ખેતીની ચાલુ સિઝનમાં જ ડીઝલ ન મળવાના કારણે ખેડૂતોના ટ્રેક્ટરો ગેરેજ જેવા બની ગયા છે. સૌથી મોટી આફત સિંચાઈ પર આવી છે; ડીઝલથી ચાલતા ઇંજન અને મોટર પંપો બંધ પડી જતાં ખેતરોમાં ઊભો પાક સુકાઈ જવાની ભીતિ સેવાઈ રહી છે. આ તરફ પશુપાલકોને પણ પશુઓ માટે લીલો ચારો લાવવા-લઈ જવા માટે વાહનોમાં ઇંધણ ન મળતા પશુધનના નિભાવનો મોટો પ્રશ્ન ઊભો થયો છે. ખેડૂતો અને પશુપાલકોની હાલત અત્યારે પડતા પર પાટુ જેવી કફોડી બની છે.
વાહનવ્યવહાર ખોરવાયો, જનતામાં આક્રોશ
ડીઝલની આ તંગી માત્ર ખેતી પૂરતી મર્યાદિત નથી રહી, પરંતુ સ્થાનિક વાહનવ્યવહાર પર પણ તેની બ્રેક વાગી છે. ફોર-વ્હીલર અને મોટા માલવાહક વાહનોના પૈડાં થંભી ગયા છે, જેના કારણે રોજિંદા ધંધા-રોજગારને વ્યાપક નુકસાન થઈ રહ્યું છે. તીવ્ર અછત છતાં તંત્ર દ્વારા હજુ સુધી કોઈ નક્કર વૈકલ્પિક વ્યવસ્થા કે પુરવઠો નિયમિત કરવાના પગલાં ન દેખાતા સ્થાનિક પ્રજા અને કિસાન આલમમાં તંત્ર સામે ભારે આક્રોશ ફાટી નીકળ્યો છે. જગતનો તાત અત્યારે વહેલી તકે ડીઝલનો પૂરતો જથ્થો ફાળવવામાં આવે તેવી આજીજી કરી રહ્યો છે.
