દારૂના જથ્થા સાથે લકઝરી બસ સહિત કુલ રૂ.28 લાખનો મુદ્દામાલ કબ્જે કરાયો
બનાસકાંઠા જિલ્લામાં પાલનપુર હાઇવે પર એલસીબી પોલીસે મોટી કાર્યવાહી કરતા લક્ઝરી બસમાંથી લાખો રૂપિયાનો વિદેશી દારૂ ઝડપી પાડ્યો હતો. રાજસ્થાનથી અમદાવાદ તરફ જતી લક્ઝરી બસમાં પેસેન્જરના લગેજની આડમાં ગુજરાતમાં દારૂની હેરાફેરી કરવામાં આવતી હોવાનો ખુલાસો થયો છે. મળતી માહિતી મુજબ બનાસકાંઠા એલસીબી પોલીસને બાતમી મળતા પાલનપુર હાઇવે પર સોની ટ્રાવેલ્સની લક્ઝરી બસને અટકાવી તલાશી લેવામાં આવી હતી. બસની અંદર તપાસ દરમિયાન અલગ અલગ બ્રાન્ડનો લાખો રૂપિયાનો દારૂ મળી આવતા પોલીસ પણ ચોંકી ઉઠી હતી.
પોલીસે કાર્યવાહી દરમિયાન અંદાજિત રૂ. 8 લાખની કિંમતનો દારૂ તેમજ લક્ઝરી બસ સહિત કુલ રૂ. 28 લાખથી વધુનો મુદ્દામાલ કબ્જે કર્યો હતો. આ મામલે લક્ઝરી બસના ચાલક હીરાલાલ વણજારા અને વિક્રમસિંહ પરમારને ઝડપી પાડી તેમની સામે ગુનો નોંધી વધુ તપાસ હાથ ધરવામાં આવી છે. પોલીસ હવે દારૂ સપ્લાયની આખી ચેઇન અને અન્ય સંડોવાયેલા લોકો સુધી પહોંચવા તપાસ આગળ ધપાવી રહી છે.
