ટાંકી પડતા હોસ્પિટલમાં અફરાતફરી : જાનહાની ટળી
વડનગર ખાતે ખૂબ જ વિચિત્ર ઘટના બનવા પામી હતી. વડનગરમાં આવેલી GMERS Medical College & Hospital ખાતે એક મોટી દુર્ઘટના બનતા બનતા ટળી ગઈ હતી. જેમાં હોસ્પિટલના ધાબે મુકવામાં આવેલી સીન્ટેક્સ પાણીની ટાંકી અચાનક ઉપરથી નીચે પટકાતા ધડાકો થયો હતો જેના લીધે હોસ્પિટલમાં થોડીકવાર માટે અફરાતફરીનો માહોલ સર્જાઈ જવા પામ્યો હતો.
વડનગર સરકારી દવાખાનામાં અચાનક જ ધાબા પરથી પાણીની ટાંકી પડવાની ઘટના બનતા દર્દીઓ સહિતના લોકોમાં ભયનો માહોલ જોવા મળ્યો હતો. અગમ્ય કારણોસર ખૂબ જ ઉંચાઈએથી પાટકાયેલી સીંટેક્સની ટાંકી સીધી નીચે પાર્ક કરેલી ઇકો કાર પર ધડાકાભેર પડતા ઇકો કારણો કચ્ચરઘાણ નીકળી ગયો હતો. જોકે સદનસીબે આ ઘટનામાં કોઈપણ વ્યક્તિને ઇજા કે જાનહાની થવા પામી નથી. ઘટનાની જાણ થતાની સાથે જ તાત્કાલિક હોસ્પિટલ તંત્ર દોડતું થયું હતું તેમજ સ્થળ પર પહોંચી પરિસ્થિતિ કાબૂમાં લેવાના પ્રયત્નો શરૂ કર્યા હતા. પ્રાથમિક તપાસમાં ટાંકીના સ્ટ્રક્ચર અથવા ફિટિંગમાં ખામી હોવાની શક્યતા વ્યક્ત કરવામાં આવી રહી છે. આ ઘટના પછી હોસ્પિટલમાં સુરક્ષા વ્યવસ્થાને લઈને પણ પ્રશ્નો ઊભા થયા છે. સ્થાનિક લોકોએ હોસ્પિટલ તંત્ર પાસે તમામ સુવિધાઓ અને માળખાકીય વ્યવસ્થાની તાત્કાલિક ચકાસણી કરવાની માંગ કરી છે જેથી ભવિષ્યમાં આવી ઘટના ફરી ન બને. આમ વડનગરની સરકારી હોસ્પિટલમાં ટાંકી પડવાની ઘટનાએ સરકારી તંત્રની કામગીરીની પોલ ખુલ્લી કરી દીધી છે.
