કાંકરેજ તાલુકાબના ચેખલા પાસે નેશનલ હાઇવે પર અજાણ્યા ટ્રેઈલરે અકસ્માત કરતા બે વિદ્યાર્થીને ઈજાઓ થઇ અકસ્માતની ઘટનામાં એક વિદ્યાર્થીને સામાન્ય ઇજા થઈ હતી, જ્યારે બીજા વિદ્યાર્થીને માથા અને છાતીના ભાગે ગંભીર ઇજાઓ પહોંચી હતી. ગંભીર રીતે ઘાયલ વિદ્યાર્થીને તાત્કાલિક 108 એમ્બ્યુલન્સ દ્વારા શિહોરી રેફરલ હોસ્પિટલ ખસેડવામાં આવ્યો હતો. પ્રાથમિક સારવાર બાદ તેને વધુ સારવાર માટે પાટણ રિફર કરાયો હતો. વધુ ઇજાગ્રસ્ત વિદ્યાર્થી રતનગઢ ગામનો 18 વર્ષીય પ્રવીણભાઈ ગાડાંભાઈ ભીલ હોવાનું જાણવા મળ્યું છે, જે ધોરણ 12માં અભ્યાસ કરે છે. અકસ્માત સર્જી ટ્રેલર ચાલક ઘટના સ્થળેથી ફરાર થઈ ગયો હતો.
શાળાના આચાર્યએ જણાવ્યું હતું કે ચેખલા એક મોટું ગામ છે અને નેશનલ હાઇવે ગામની વચ્ચેથી પસાર થતો હોવાથી ગામલોકો અવારનવાર અકસ્માતનો ભોગ બનતા રહે છે. આજુબાજુના વિસ્તારોમાંથી પણ વિદ્યાર્થીઓ અભ્યાસ માટે અહીં આવે છે. નેશનલ હાઇવે પર હજારો વાહનોની અવરજવરને કારણે અકસ્માતોનું જોખમ રહે છે. આચાર્ય અને ગ્રામજનોએ સરકાર સમક્ષ બ્રિજ બનાવવાની માંગણી કરી છે, જેથી આવા અકસ્માતોને અટકાવી શકાય અને લોકોની સુરક્ષા સુનિશ્ચિત કરી શકાય.
