બનાસકાંઠા જિલ્લાના પાલનપુર શહેરમાં ખોદકામ દરમિયાન ગેસ પાઇપલાઇન લીકેજ થવાની ઘટના સામે આવી હતી.
પાલનપુરની ભાગ્યોદય સોસાયટી વિસ્તારમાં ખોદકામ કામગીરી ચાલી રહી હતી તે દરમિયાન આ બનાવ બન્યો હતો. મળતી માહિતી મુજબ ખોદકામ દરમિયાન જેસીબી મશીનથી અચાનક ગેસની પાઇપલાઇન તૂટી જતા ગેસ લીકેજ શરૂ થયું હતું. ઘટનાને પગલે આસપાસના વિસ્તારમાં અફરાતફરીનો માહોલ સર્જાયો હતો અને સ્થાનિક લોકો ભયભીત બન્યા હતા.
ગેસ લીકેજ થતાં જ ખોદકામ કરી રહેલો જેસીબી ડ્રાઇવર મશીન સ્થળ પર જ મૂકી નીકળી ગયો હોવાનું જાણવા મળ્યું છે. ઘટનાની જાણ થતાં સંબંધિત વિભાગની ટીમો સ્થળ પર દોડી આવી હતી અને ગેસ લીકેજ કાબૂમાં લેવા કામગીરી હાથ ધરાઈ હતી. સદનસીબે આ ઘટનામાં કોઈ જાનહાનિ થઈ નથી, પરંતુ બેદરકારીપૂર્ણ ખોદકામને લઈને સ્થાનિકોમાં રોષ જોવા મળ્યો હતો.
