ગનાપીપળી ઢાળ નજીક કાર પર પથ્થરમારો કરી ધારદાર હથિયાર બતાવી લૂંટનો પ્રયાસ
ભાદરવી પૂનમના મેળા પૂર્વે હડાદ પોલીસને મોટી સફળતા મળી છે. હડાદ તરફથી અંબાજી થઈ રણુજા તરફ જતા ભક્તોને નિશાન બનાવી લૂંટનો પ્રયાસ કરતી ગેંગનો પોલીસે પર્દાફાશ કરી પાંચ આરોપીઓને ઝડપી પાડ્યા છે.
મળતી માહિતી મુજબ, ગનાપીપળી ઢાળ નજીક બદમાશોએ ભક્તોની કારને નિશાન બનાવી કાર પર પથ્થરમારો કર્યો હતો. ત્યારબાદ ધારદાર હથિયારો બતાવી કારમાં સવાર લોકોને ધમકાવી લૂંટ કરવાનો પ્રયાસ કરવામાં આવ્યો હતો. ઘટનાની જાણ થતાં હડાદ પોલીસે સમગ્ર મામલાને ગંભીરતાથી લઈ તપાસ હાથ ધરી હતી.ભાદરવી પૂનમના મેળાને હવે ગણતરીના દિવસો બાકી રહ્યા છે ત્યારે પોલીસે બાતમીદારો તેમજ હ્યુમન ઇન્ટેલિજન્સના આધારે તાબડતોબ કાર્યવાહી કરી લૂંટના પ્રયાસ સાથે સંકળાયેલા પાંચ આરોપીઓને ઝડપી પાડ્યા હતા.
પોલીસે ઝડપાયેલા આરોપીઓ પાસેથી ગુનામાં ઉપયોગમાં લેવાયેલા હથિયારો તેમજ લૂંટના પ્રયાસમાં ઉપયોગમાં લેવાયેલી મોટરસાઇકલ પણ કબજે કરી છે. પોલીસે આરોપીઓની પૂછપરછ સહિતની વધુ તપાસ હાથ ધરી છે.આ મામલે હડાદ પોલીસ સ્ટેશનમાં પાંચેય આરોપીઓ વિરુદ્ધ લૂંટ સહિતની વિવિધ કલમો હેઠળ ગુનો નોંધવામાં આવ્યો છે અને સમગ્ર મામલે આગળની કાયદેસરની કાર્યવાહી હાથ ધરવામાં આવી છે.
ભાદરવી પૂનમના મેળા દરમિયાન અંબાજી તરફ મોટી સંખ્યામાં પદયાત્રીઓ અને ભક્તો જતા હોય છે. તેવામાં ભક્તોની સુરક્ષાને ધ્યાનમાં રાખીને હડાદ પોલીસની આ કાર્યવાહી મહત્વપૂર્ણ માનવામાં આવી રહી છે. પોલીસ દ્વારા માર્ગો પર પેટ્રોલિંગ અને શંકાસ્પદ તત્વો પર નજર વધુ સઘન બનાવવામાં આવી છે.
